عنوان الوصفة: طريقة عمل بيتزا ألذ من مطاعم البيتزا السريعه من بيتزا هت بالصور . اضيفت بواسطة : غزلان أم طلال . بتاريخ: 21/12/2014.
طريقة عمل بيتزا ألذ من مطاعم البيتزا السريعه من بيتزا هت بالصور
جايبه لكم بيتزا روعه في الرائحه والطعم والاعداد اذا جربتوها مره ما راح تنسونها بالمره وراح تعتمدون عليها في كل المناسبات وكل من جربها طلب الوصفه من عندي والحلو منها تصير كميه كبيرة وتقدرين تجمدينها ومتى ما حبيتي طلعيها وخلي الثلج يذوب وبعدين الى الفرن الين تتحمر وراح تكنسلون مطاعم البيتزا السريعه من بيتزا هت ودومينوز بيزا وغيرهم
والحين هيا الى العمل
مقادير وطريقة عمل وتحضير البيتزا والصلصة :
1. صلصه البيتزا الخاصه بي
مقاديرها :
1. كيلو طماط مقطع مربعات
2. اعشاب ايطاليه مجففه (تلقينها في علبه ) تتكون من الريحان وغيرها الكميه حسب الرغبه كلما زيدتي طلع احلى مب معناه تحطين العلبه كامله
3. رشه ملح
4. رشه فلفل احمر
5. نص بصل صغيره مفرومه
6. ربع فلفل اخضر بارد مفروم
7. ملعقه زيت
8. رشه فلفل اسود
9. صلصه كاتشب ملعقتين طعام
10. صلصه الطماطم ملعقه
11. فص ثوم مفروم
الطريقه:
تحمرين البصل والثوم والفلفل الاخضر في الزيت وبعدين تحطين الطماط والبهارات الي ذكرتها وتتركينها لما تتسبك تصير ثقيله وبعدين تحطين الاعشاب وصلصه الطماط والكاتشب وتتركينه دقيقتين وتشلينه وبس وبتكون جاهزة
2. بيبروني انا اشتريه بالوزن يطلع الذ وارخص وفرش والكميه اكثر من المغلف انا شريت ربع كيلو بـ 16 ريال
3. جبن مازوريلا بعد اشتريه بالوزن ارخص وفرش والكميه اكثر من الجاهز والمبشور انا شريت نص كيلو طلع ب 25 ريال
3. قواعد بيتزا جاهزة نص مخبوزه القطعتين بـ 4 ريال والصغيرة اربع قطع بـ 4 ريال
هاذي القواعد الصغيره
والآن الطريقــــــــــــــــــــه:
1. تاخذين القاعده وتحطينها على سطح مستوي
2. وتحطين عليها الصلصه
3. وتبشرين المازوريلا بالمبشره
4. وتحطين كميه قليله من جبن المازوريلا على الصلصه
5. وتصفين البيبروني على الوجه
6. وتحطين مره ثانيه على الوجه جبن المازوريلا بكميه اكبر
7. وخذيت صحن من الفلين
8. وتحطين البيتزا فوقها
9. وتلفينها وبورق شفاف النايلون
10. وتحطينها في الفريزر
وانا سويت بيتزات صغيرات بالسجق حق ولدي
** خذيت القاعدة الصغيرة وحطيت عليها الصلصه وشوي جبن
وهذاي الشكل النهائي على البيتزا الصغيرة بعد ما ضفت عليه الاعشاب على الوجه قبل النضج بقليل
والحين البيتزا الكبيره
مستعدين
يله شوفوها