مكونات كيكة الفدج:
كوبين وتلتين دقيق
ملعقة كبيرة بيكنج بودر
ربع كوب كاكاو خام
كوب الا ربع سكر
تلت كوب سكر بنى
3 بيضات كبار
فانيليا
نصف كوب ساور كريم(كريمة حامضة)
كوب الا ربع زبدة طرية
نصف كوب زيت
كوب وتلت مياه باردة
مكونات صوص الفدج:
كوب فريش كريم
ملعقة كبيرة زبدة طرية
نصف كوب سكر بنى
2 ملعقة كبيرة عسل جلوكوز
فانيليا
ربع كيلو شوكولاته مقطعة
وللتزيين:
فراولة
شوكولاته دارك وابيض ذائبين
(او حسب الرغبة)
طريقة عمل كيكة الفدج:
فى اناء هنحط الدقيق والبيكنج بودر والكاكاو الخام والسكر الابيض والبنى
ونخلطهم وفى اناء تانى هنحط البيض والفانيليا والساور كريم
ونضربهم بالمضرب الكهربائى
وفى اناء تالت هنحط الزبدة والزيت والمياه الباردة
ونضربهم
ونضيفهم لخليط الدقيق والمواد الجافة
ونضربهم
ونضيفلهم خليط البيض والكريمة
ونضربهم كويس لغاية ماتمتزج المكونات
ونحط الخليط فى صينية مدهونة مقاس 26
خبزتها فى فرن حرارته هادية وطلعتها لما استوت وطبعا كل واحد فرنه غير التانى
دخلتها التلاجة ساعتين تبرد وقسمتها نصفين
هنعمل صوص الفدج
فى كسرولة هحط الفريش كريم والسكر البنى
وعسل الجلوكوز
والزبدة
ونقلبه ونسيبه يغلى على النار
وبمجرد مايغلى نطفى النار ونضيفله الشوكولاته المقطعة والفانيليا
ونقلب لغاية مالشوكولاته تدوب وهيبقى الصوص ناعم وبيلمع
ونحط جزء منه على الكيكة بعد ماقسمناها
ونحط الصوص يجمد فى التلاجة شوية عشان هنغلف بيه الكيكة من برة
والفراولة للتزيين هحط عليها شوكولاته دارك سايحة واعمل عليها خطوط بالشوكولاته البيضاء
هى الكيكة مكوناتها كتير لكن تستحق التجربة عشان طعمها متميز والمكونات هنا مينفعش نستبدلها بمكونات بديلة ماعدا عسل الجلوكوز ممكن نستبدله بعسل نحل وبالنسبة للساور كريم هو متوفر جدا فى اى سوبر ماركت في قسم الكريمات زى كريمة الطبخ والحلويات
وده شكل الكيكة النهائى
وبالهنا والشفا