السينابون اللذيذ على طريقة الريم . .
كما اللي بالمحلات وفروا قروشكم وجربوه وشوفوا كيف راح تدمنونه
ركزوا راح اعطيكم هنا العجينة
السينابون اللذيذ بالعجينة اليابانية ونكهة البندق
السينابون معروف انه من سنة حفرو البحر
ماهو شي جديد بس الجديد الاشياء اللي اضفتها عليه من ابتكاري
واتمنى اللي تسويه ماتنسب الطريقة لنفسها .
المهم ركزو
اول شي تجيبين
كاسه مويه
ونص الكاسه دقيق
وتخلطينها مع بعض بالخفاق اليدوي
ثم تحطينها ع النار
لمدة ٣ دقايق بس لحد مايغلظ قوامها
وانتبهي لا تغلي ابداً
ارفعيها عن النار وحطيها بصحن وغطيها ب " النايلون " وخليه يلامسها عشان ماتتكون قشرة
هالخليط الأول خلصنا منه نجي
لـ مقادير العجينة الاساسية :
بيضة وحدة
٢ ونص كاسه دقيق
١ م خميره
نص كاسه حليب سائل
٤ م سكر تقريباً فنجان قهوة
رشة ملح
اهم شي ثلث اصبع زبدة و تكون لينة بحرارة المطبخ و نص من الخليط اللي سويناه ع النار وحطيناه بصحن وكل وحده والكمية اللي تحتاجها
العجينة معروفة ومجربة
استخدمت العجانة ماشاء الله اول مره يطلع معاي السينابون هش ولذيذ مثل اللي بالمحلات حطيت اول شي المقادير الجافة
ثم حطيت المقادير السائلة
اللي هي البيضه والحليب والزبدة
ثم اضفت العجينه اللي سويتها ع النار
وعجنتهم لمدة ١٠ دقايق لحد ماصارت العجينة مطاطية ومتماسكة وتهول
غطيتها وخليتها نص ساعه لحد ماتخمرت وبعدين فردتها وحطيت زبدة
بالنسبة للحشوة :
ملعقتين كبيرة سكر مطحون
وملعقتين كبيرة قرفة
استخدمت ظرفين من قهوة البندق
وانتو عاد كيفكم بالكمية حسب حاجتكم
لفيتها رول وقطعتها بسكين حادة كبيرة
ورصيتها بالصينية وتركتها نص ساعه وبعدين دخلتها الفرن ولما تحمرت طلعتها
الدمج بين البندق و القرفه عطاني نتيجة مره لذيذة
وحطيت الصوص الأبيض
الصوص الأبيض نخلط :
٤ حبات جبن كيري
وعلبة صغيرة نستلة
ونص العلبة قشطة قيمر
وظرف واحد دريم ويب
و فنجال حليب سائل بارد
وشوي فانيليا
ونزينها بالكراميل والجوز وبالعافيه
اتمنى يكون عجبكم ابتكاري الجديد للسينابون بـ نكهة البندق والصوص الأبيض
جربوا طريقتي وبإذن الله راح تدعون لي
اعطيتكم السر بالهشاشة واللذاذة
