لأن السلطات والخضار مفيدة جدا وعشان نخلي طعمتها أطيب
جمعت عدد لا بأس به من الصلصات لاضافة نكهات متنوعة للسلطات
بعضها يضاف للسلطة أو فوقها
وبعضها يكون على شكل dip لتغميس الخضار
والبعض كمان لاضافته على الدجاج أو السمك بأنواعه
ان شاء الله تعجبكم :
صلصة الخل
مقادير صلصة الخل
ثلاث ملاعق من الزيت
ملعقة من الخل
قليل من الملح
قليل من الفلفل
طريقة تحضير صلصة الخل
يخلط الزيت مع الخل و الملح و الفلفل
ملاحظة
للحصول على نكهات مختلفة، يمكن استعمال أنواع مختلفة من الزيوت، مثل زيت الزيتون، أو الجوز، أو الذرة، أو السمسم، أو أنواع مختلفة من الخل، مثل الخل الأبيض، أو الأحمر، أو خل التفاح، أو خل الأندلس
صلصة الخل بالاعشاب
المكونات: نعناع اخضر ..كام عود كده
بردقوش ممكن ناشف او اخضر
بقدونس
خل احمر ..ملح وفلفل...(ممكن الاستغناء عن المستردة)
زيت زيتون
حناخد اوراق الاعشاب بس ...وبعد غسلها كويس ..نفرمها
ونجهز صلصة الخل كما سبق وبعد كده نضيف عليها الاعشاب ونقلبها كويس ونظبط الطعم
ودى ممكن استخدامها مع السلطة اليونانية...(واللى بتتكون من طماطم وفلفل رومى وخيار وبصل وزيتون وجبنة فيتا)
صلصة الجبن الازرق blue cheese dressing
طبعا ده نوع معروف من الدريسينج..وبقدم مع انواع عديدة من السلطات ..وممكن برضه يقدم مع اللحوم...
الكونات : بصلة مفرومة
عصير ليمون
نصف كوب لبن
ورقة زبدة صغيرة 30 جرام تقريبا
جبن زرقاء..اللى هى جبنة ريكفورد.....
ملعقة نشا
نصف كوب كريمة
بشر ليمونة
فص توم مدقوق ناعم
حنضع الزبدة على النار..تسيح ونضيف البصل والتوم ونقلب لحد مايصفر
نضيف الجبنة ونقلب لحد ماتسيح ....
نضيف النشا..والكريمة واللبن لحد الخلي فى الغليان ويبقى سميك نوعا ...نضيف بشر الليمون وعصير الليمون
طبعا مافيش ملح لان الجبنة طعمها لاذع اصلا..الا اذا كانت محتاجة...
طريقة اخرى
نحضر الجبن الازرق....4 ملاعق خل احمروفلفل مطحون وزيت زيتون
نفتت الجبن بالاصابع او بالشوكة ....نضيف تلت الكمية مع الخل ونقلب كويس بمضرب سلك ...نضيف الزيت على شكل شريط ببطء..ونكمل تقليب الى ان يتكثف الخليط....
بعد كده نضيف باقى الجبنة بدون خفق ..نقلب بس علشان تتوزع فى الصوص..ونظبط برضه الطعم لو محتاجة ملح او كده ...ونسيبها فى التلاجة شوية على مانحضر السلطة
صلصة كول سلو دريسينج
المقادير: كوب وربع مايونيز
ملعقتين او تلاتة سكر
ربع كوب خل
ملح ...فلفل اسود مطحون
نخلط المقادير مع بعض كويس جدا...ونسيبها فى التلاجة ساعة وبعد كده نضيفها على السطة (واللى هى عبارة عن كرنب مبشور وع جزر مبشور وممكن اضافة كرنب احمر مبشور )
صلصة سيزر دريسينج
المقادير:..ملعقة جبنة بارميزان مبشورة ...ملعقة سكر....نصف كوب مايونيز....ملعقة صويا صوص ...او علبة انشوجة..نفتتها بالشوكة
3 فصوص ثوم مدقوق...ملعقة مستردة...عصير ليمونة...خل (ممكن خل تفاح)..زيت زيتون
بردقوش ناشف...ممكن شوية ريحان ناشف
نهرس الانشوجة بالشوكة ونضيف عليها الثوم والمستردة والفلفل والليمون والخل والمايونيز ..كل المكونات يعنى ...ونقلب كويس جدا وبعد كده نضيف الزيت ببطء ..ونظبط الطعم
صلصة دريسينج السلطة الفرنسية
المقادير: عصير ليمون (ربع كوب)
كوب وربع زيت زيتون
ملح وفلفل
ملعقة حبوب خردل(اللى بيتعمل منها المستردة بس عايزينها ناشفة لو امكن )
شوية بابريكا (فلفل احمر حامى)
نقلب المفادير مع بعضها كويس جدا ونستخدمها على السلطة الفرنسية
صلصة تشيللى سلاد دريسينج
المقادير:...
كوب مايونيز
ملعقة بقدونس متخرطة رفيع
ملعقة كاتشب
بصلة صغيرة مبشورة ناعم
راس فجل مطحونة ناعم
نقلب المقادير على بعضها كويس ونظبط الطعم وتتقدم مع اللحم المشوى او الفراخ وكذلك على السلاطة
صلصة جينجر (زنجبيل) دريسينج
المقادير: 2 ملعقة خل
ملعقة زيت سمسم
ملعقة سكر
جينجر(زنجبيل ) طازج مبشور..فى حدود ملعقتين مثلا
ملعقة صويا صوص
نصف كوب عصير اناناس
نخلط كل المقدير مع بعض وممكن نخلطها فى الخلاط علشان الزنجبيل يتفرم كويس .....
تستخدم فوق السلطة الخضراء ...وسلطة الفراخ ...او سلطة المكرونة
صلصة الأفوكادو
لعمل الصلصة ستحتاجون لـ :
2 افوكادو ناضجه
1 فص من الثوم الطازج
عصير الليمون الطازج
1/2 ملعقة صغيرة من الملح (أو حسب الذوق)
المقادير طبعا بترجع للكمية اللى بتحضروها يعنى قابلة للزيادة والنقصان
الطريقة: نقشر الافوكادو ونقطعه شرائح رفيعة
نخلط كل المقادير التانية مع الافوكادو ..ونهرس الافوكادو والمقادير بالخلاط
وتستخدم
صلصة thousand island dressing recipe
المكونات: كوب مايونيز
نصف كوب صوص حامى او كاتشب
ملعقتين زيتون
ملعقتين فلفل رومى مفروم
ملعقة بصل مفروم
ملعقة فلفل حلو مفروم
الطريقة كالعادة نمزج كل المقادير مع بعض ونشيلها فى التلاجة شوية
صلصة الخل (نوع تانى)
المكونات : نصف بصلة مفروم...
ملعقة ونصف خل
ملعقة عسل ابيض
نصف ملعقة حبوب الخردل مطحون
ربع ملعقة زنجبيل مطحون
ملح وفلفل
زيت زيتون
عصير ليمون
ملعقة حب الخشخاش..(من عند العطار هه مش من حتة تانية)
الطريقة ..نضيف المكونات على بعضها ونمزجها جيدا ونبدأ نضيف الزيت ببطء على هيئة شريط وناتبع الخفق حنلاحظ ان الصلصة بدات تتكثف
نضيف حب الخشخاش (اختيارى)
ونبدأ نقلب تانى ونظبط الطعم...
صلصة جوز الهند
ودى ممكن نستخدمها مع انواع كتير من السلطات وسلطة المكرونة وسلطة اندونيسية اسمها جادو جادو...
المقادير:
كوب ونصف ماء
ثلاث او اربع ملاعق جوز هند مجفف بودرة يعنى او مطحون جامد جدا
زيت نباتى
فستق مطحون
3 فصوص ثوم مفروم
بصلة مفرومة
ملعقة بابريكا ...فلفل احمر مطحون حامى
ملعقة صويا صوص
عصير ليمونة
ملعقتين سكر بنى
الطريقة
نغلى الماء على النار واول ما تغلى نضيف جوز الهند ونقلب ونرفع الحلة من على النار ونغطيها لمده نصف ساعة
علشان جوز الهند يتنقع
نسخن نصف كمية الزيت زنحمص الفستق لحد ما ياخد لون (وده علشان يبقى له رائحة ذكية)
وبعد كده نطحنه جامد فى الخلاط
طبعا حنطحن الثوم والبصل كويس جدا
نسخن الزيت الباقى ونضيف البصل مع التحريك المستمر لحد ما لونه يبقى دهبى شوية ونضيف الثوم والفلفل ونقلب دقيقتين
بعد كده نضيف الصويا صوص وعصير الليمون ونقلب
نشيل الكلام ده من على النار ونضيف الفستق والسكر البنى ونقلب ونسيبه يبرد
نصفى جوز الهند عن طريق شاشة علشان ناخد المية لوحدها ونضغط على الشاشة جامد علشان نتخلص من كل السائل الموجود..طبعا بنتخلص منه فى سلطانية ..وبعد كده استغنى عن جوز الهند
نضيف حليب جوز الهند للصلصة واحدة واحدة الى ان تصبح متماسكة وبعد كده نظبط الطعم ..ولو كانت سميكة زيادة نضيف لها ملعقة ماء ونقلبها شوية على النار..ونرش الوجه بقدونس مفروم
وطبعا دى بتتقدم جنب نوع السلطة جادو جادو او ممكن نستخدمها كصلصة تغميس
صلصة التوت
المقادير:...
طبعا التوت مش متوفر فى السوق فممكن نجيبه معلب من السوبر ماركت ....نقول علبة مثلا
ربع كوب صغير خل وممكن خل تفاح
كوب مايونيز
ملعقتين كريمة لبانى مكثفة
ملح وفلفل
زيت زيتون...او لو قدرتم تحصلوا على زيت بندق يبقى افضل
الطريقة
نهرس التوت فى مصفاة سلك ونخلى بالنا ناخد برضه التوت اللى حيكون متكون فى ضهر المصفاة
ونضيف للتوت المهروس ده باقى المكونات ونحرك كويس بالمضرب السلك ونظبط الطعم
وده بيضاف برضه على انواع عديدة من السلطات منها سلطة اسمها فانتازيا
صلصة سلطة الجزر
المكونات:....
3 ملاعق خل تفاح ...(طبعا المقادير بتختلف تبعا للكمية)
ملعقة صغيرة سكر
ملح وفلفل وزيت
الطريقة
نخفق الخل مع السكر والملح والفلفل ..ونبدأنضيف الزيت ببطء على شكل شريط رفيع مع الاستمرار فى الخفقان بالمضرب السلك...فتتكثف الصلصة قليللا ..ونظبط الطعم ..وتضاف على سلطة الجزر المبشور....او اى سلطة اخرى
صلصة البرتقال
الدريسينج دى بتتضاف لسلطات مختلفة ..يعنى النوع ده بيتضاف على سلطة اسمها سلطة العيد مكوناتها عبارة لحم ديك رومى وارز اسود..(موجود فى السوبر ماركت مع المنتجات الاسيوية وبالتحديد فى الفا )
المقادير:
50 جرام سكر
برتقالة..ولو برتقال احمر يبقى افضل
كرات
خل تفاح
زيت
الطريقة..
نقشر البرتقالة وناخد القشر نخرطه شرائح رفيعة
ونرفعه على النار فى شوية مية ..ونسيبه يغلى دقيقتين
وبعد كده نصفيه
ناخد القشر اللى اتسلق ده نصف سلقة طبعا ونقطعه حتت صغيرة جدا زى مابنقطع البقدونس كده
نرجع للبرتقالة نعصرها ونضيف للعصير بتاعها الخل والكرات المفروم والملح والفلفل
نصب الزيت بنفس الطريقة السابقة على شكل شريط وببطء ونقلب ..علشان الخليط يتخن معا شوية ..نظبط الطعم
وقشر البرتقال بقى بنضيفه على السلطة نفسها ..
صلصة المشاوي لشوى اللحوم والفراخ
المكونات :
زنجبيل طازج
فصين ثوم
ملعقتين مستردة
ملعقتين خل
3 ملاعق زيت سمسم
ملح وفلفل
4 ملاعق صويا صوص
ملعقة سكر صغيرة
زيت
الطريقة
نقشر الزنجبيل وهو طبعا عبارة عن جدور ونفرمه
نفرم الثوم
نمزج المكونات مع بعضها كويس وفى الاخر نضيف الصويا صوص
المزيج ده بيتنقع فيه صدور الفراخ للشوى وبعد كده بنعمل بها نوع سلطة اسمها سلطة الدجاج المشوى
والمزيج ده نشيل منه شوية وبعد كده نضيف عليها شوية خل وبعد كده نضيف زيت السمسم ونقلب علشان تسمك
صلصة البرتقال بالبندق لسلطة السلمون
الدريسينج ده ممكن اضافته على سلطة اسمها سلطة الخس بالسلمون
المكونات :
4 برتقالات
50 جرام بندق
ملح وفلفل
ملعقتين خل احمر
ملعقتين كريمة لبانى
ملعقتين زيت بندق
طبعا ممكن نستخدم خل عادى وزيت زيتون او زيت عادى برضه
الطريقة
نعصر البرتقال ونحمص البندق كويس وننزع قشرته
ونفرمه
ناخد عصير البرتقال ونضيف عليه الملح والفلفل والخل والكريما ونمزجه كويس جدا
ونبدأ نضيف الزيت ببطء زى ماعرفنا وبعد كده نضيف البندق المفروم ونظبط الطعم
صلصة الزبادى بالجبنة
الدريسينج ده يا جماعة منخفض السعرات الحرارية
المقادير:...
كوب زبادى منزوع الدسم
طبعا هو ممكن يستبدل بلبن المخيض...لو متوفر..وهو على فكرة موجود فى مدينة الحمام فى الساحل الشمالى يعنى فركة كعب
جبنة لايت ودى فى السوبر ماركت
شوية خل
3 فصوص توم مفروم ناعم
شبت متخرط ناعم جدا
ملح وفلفل لظبط الطعم
نضرب الجبنة والمقادير كويس جدا فى الخلاط وبعد كده نقلب عليهم الزبادى وممكن ياخد خبطة واحدة فى الخلاط..ونظبط الطعم ونشيلها فى التلاجة
صلصة الفلفل الاخضر والريحان
المقادير:..ممكن نستخدم فلفل اخضر او احمر ثمرة واحدة (برضة المقادير تبعا للكميات)
جبنة لايت (fatfree)
3 فصوص توم مفروم ناعم
عصير ليمونة
ملح وفلفل لظبط الطعم
حزمة ريحان اخضر متخرطة رفيع جدا (ودى متوافرة فى السوبر ماركت)
ثوم اخضر..وده برضه ياجماعة موجود فى السوبر ماركت بيبقى عيدان خضرا رفيعة متجمعة فى حزم ...شبه عيدان البصل الاخضر كده..بس ارفع ومن غير رووس...وممكن نستغنى عنه ..نخرط نصف حزمة رفيع جدا برضه
الطريقة
نشوى الفلفل من جميع الجوانب اما على صاج شوى او فى الفرن لحد ما الجوانب كلها تتشوى وتاخد لون غامق
بعد كده نلفها فى حتة ورق سلفر او نحطها فى طبق ونحكم الغطا عليها علشان نحتفظ بالبخار بتاعها لفترة حوالى ربع ساعة
بعد كده نفتحها ونشيل منها البذر والعنق بتاعها ونفرمها
نضرب الجبنة فى الخلاط لحد ماتنعم
نضيف عصير الليمون والفلفل والملح والفلفل الاسود ونخلطهم فى الخلاط بعد كده نقلب الثوم الاخضر ده لو كنا جبناه والريحان
دى مافيهاش دسم خالص يعنى زيرو فات وكل ملعقة منها فيها 10 كالورى
صلصة شرقى Oriental dressing
المقادير...فص توم مفروم
كوب خل ارز (او خل عادى)
ملعقة صويا صوص لو لايت يكون افضل
جدر زنجبيل طازج نقشره ونفرمه
نقلب كل ده مع بعض ونظبط الطعم ونسيبه ساعة فى التلاجة
صلصة يابانى japanese carrot dressing
المقادير:
1 جزرة مبشورة
عصير عنب
ملعقتين خل ارز او خل تفاح
ملعقة صويا صوص
نصف ملعقة زيت سمسم
ملعقة مستردة
زنجبيل مفروم
نخلط المقادير فى الخلاط لتتجانس ونغطيها كويس وممكن نحتفظ بها فى التلاجة لمدة اسبوع
صلصة الصويا والبرتقال تايوانى Royal-orange-thai-dressing
المقادير:
فنجان عصير برتقال
ملعقة زنجبيل مفروم
ملعقة توم مفروم
ملعقة صويا صوص
ربع كوب خل ارز
نقلب كله مع بعضه بشوكة ونحتفظ به
Sweet & Sour dressing
كوب ماء
ربع كوب خل تفاح
نصف فنجان سكر
ملعقة فلفل احمر حامى مطحون
ملعتقين مستردة
ملعقة كرفس(يفضل ناشف او اخضر مطحون ناعم جدا)
نقلب كله مع بعض
صلصة هندى Indian dressing
ربع كوب عصير برتقال
ملعقة رووس كرفس افرنجى مفرومة ناعم
ملعقة ورق كرفس مفرومة
نصف ملعقة مسترد
نقلب كله مع بعض برضه ونسيبها خمس دقايق
Basic-dressing
المكونات
ربع كوب خل احمر او خل ارز (او اى خل )
فنجان عصير تفاح مركز
ملعقة فلفل حامى (بابريكا)
فصين توم مدقوق ناعم
نصف ملعقة بصل مجفف بودرة (فى السوبر ماركت)
عصير ليمونة
ملعقتين صويا صوص
ملعقتين مستردة
تلت كوب ماء
الطريقة:
نخلط كل المقادير فى برطمان له غطاء محكم ونرجه كويه جدا لحد المحتويات ما تتجانس مع بعضها ...
الدريسينج ده ممكن يستخدم لكل انواع السلطات ...وممكن كمان نبتكر فيه شوية ...
ممكن نضيف كمون ...ممكن نضيف ريحان ورز مارى مفروم..وممكن كمان نضيف خيارة مخللة متخرطة رفيع جدا .وهكذا
صلصة المانجو والبرتقال
المكونات:
ثمرة مانجو متخرطة وعصير برتقال ..فصين توم مدقوق...ملعقتين صويا صوصو ..وربع ملعقة كارى
نضرب المكونات فى الخلاط ونظبط الطعم
صلصة التغمييس Dips
*** صلصة تايلاندية Thai sweet & sour sauce
المقادير:
ملعقة سكر - كوب ماء - حبة قلقل اخضر ونحتفظ بالبذور فيها
حبة او اتنين فلفل احمر حامى - فصين توم مطوحنين كويس
ملعقة صغير ملح ...( وبالمناسبة فيه ملح بحر بيتباع لو حد قدر يحصل عليه يكون افضل )
عصير ثلاث او اربع ليمونات - 3 ملاعق صوص سمك جاهز (من السوير ماركت ) او صويا صوص
نخلط السكر والماء ...نخرط الفلفل صغير جدا ونضعه فى الخلاط مع الماء والسكر ونضيف الثوم والملح ونضربلحد الخليط ما ينعم ..طبعا حنلاحظ ان بذور الفلفل زى ماهى وده المطلوب
- نضيف عصير الليمون وصوص السمك او الصويا صوص ..ونمزج الخليط
المفروض يا جماعة بنضيف مادة صمغية طبيعية اسمها Xanthan gum بس طبعا انا مش عارفة هى بتتوافر فين لو حد يعرف يبقى كويس
*** صلصة الفول السودانى التايلاندية Thai peanut sauce ***
المكونات :
3 ملاعق صويا صوص
3 ملاعق زبدة فول سودانى
2 ملعقة خل ابيض
ربع ملعقة فلفل ابيض مطحون - نصف كوب سودانى مش مملح - فصين توم مهروسين
زنجبيل مطحون - زيت سمسم - شطة (اختيارى)
نخلط المقادير كلها على بعض..ونطحن جزء من السودانى ونضيفه للمكونات ..ونرش باقى السودانى على الوش عند التقديم
***صلصة تايلاندى ثانية***
المكونات :
ملعقة زيت سمسم - ملعقتين او ثلاثة فلفل احمر مطحون - نصف كوب شبت متخرط رفيع - ملعقتين كارى
بشر ليمونة - كوب ونصف لبن جوز هند - كوب زبدة فول سودانى - ملعقتين سكر - ملعقتين تمر هندى (عصير)
عصير ليمونة -
** نسخن الزيت ونقلب فيه الفلفل الاحمر على نار هادئة...ونضيف الشبت والكارى وبشر الليمون ( ولو ورق ليمون يكون افضل) ونسخن لحد المحتويات ماتختلط ببعضها
نضيف لبن جوز الهند وزبدة الفول السودانى والسكر وتمر هندى ..نسيبهم يغلوا غلوة ونقلب..
وممكن نخفف بشوية لبن جوز هند تانى او ماء لو لقينا ان الخليط سميك ..وبعد كده نضيف عصير الليمون ونقلب ..
صلصة التارتار
المكونات :
كوب مايونيز - ربع كوب عصير ليمون - بصلة مفرومة - شبت مخرط رفيع ( وفيه منه نوع مخلل فى برطمانات فى السوبر ماركت يكون افضل
الطريقة: نخلط المكونات ونقلبها ونغطيها ونحفظها فى الثلاجة .
الصلصة الحلوة الحريفة
يوضع كوب من عصير الاناناس مع ملعقتين خل وملعقتين سكر بنى وملعقتين صويا صوص فى حلة صغيرة ونقلب المكونات على النار حتى يذوب السكر
نخلط ملعقة دقيق ذرة مع ملعقتين ماء وندوب الدقيق حتى يصبح معجونا املس ..بعد كده نضيف الدقيق ده على الحلة ونقلب على نار هادية حتى يغلى ويتكثف ..وتقدم دافئة.
**صلصة تايلانديه**
نحضر حبة خيار وننزع منها القلب (الذور) ونفرمها ناعم ونضيفها لبصلتين مفرومين ناعم برضه
مع قرن فلفل احمر حامى من غير البذر ومفروم ناعم ...ونضيف ملعقة كسبرة خضراء مفرومة
نسخن تلت كوب سكر مع ربع كوب ماء على النار حتى يذوب السكر ..ونضيف باقى الخليط ونقلب ...يقدم بارد .
**صلصة الصويا والزنجبيل **
نحضر زنجبيل طازج مفروم..ونصف كوب صويا صوص (النوع السميك) ونضيف فص توم مفروم ونقلب الخليط.
**صلصة الخوخ **
نصفى محتويات علبة كمبوت خوخ محفوظ من الماء ..ونحتفظ بالماء الموجود فيها
ونضرب الخوخ فى الخلاط ..مع العصير بتاعه ونصف كوب سكر بنى ونصف كوب خل وملعقة صغيرة زنجبيل مطحون وفصين توم مدقوق ناعم ..
بعد كده نرفع المكونات على نار هادئة حتى تغلى وتحرك من وقت لاخر لمدة تلت ساعة ةتقريبا ..وبعد كده نسيبها تبرد وتقدم .
**واسابى wasabi sauce**
هو معجون الفجل الحامى ويستخدم فى المطعم اليابانى
طبعا اساس الوصفة الفجل الاخضر..لكن ممكن نستخدم رؤؤس الفجل العادى نطحنها جامد فى الخلاط ونضيف عليها مايونيز وملعقتين خل ونظبط الطعم....
صلصة الباربيكيو
المقادير:
2 حبة فلفل رومى احمر منزوع البذر ومفروم خشن
كيلو طماطم مستوية حمراء مفرومة خشن
بصلتين مفروم ناعم
حزمة كرفس مفرومة بعد غسلها بالماء والخل
2 كوب ونصف خل
قرنان فلفل احمر حامى شطة مفروم ناعم
3 فصوص ثوم مهروس ناعم
ملعقتين زنجبيل مبشور
نصف حزمة كزبرة خضراء الاوراق فقط ..مفرومة ناعم
ملعقة صغيرة كمون - ملعقة مستردة - ملعقتين فلفل ابيض - ملعقة صلصة تابسكو ( حاور لكم عليها9
كوب سكر بنى ..
الطريقة:
نقلب الفلفل والطماطم والبصل والكرفس والخل والفلفل وكل المقادير يعنى ماعدا السكر
ونرفعهم على النار ونقلب من وقت لاخر..ونوطى النار ونسيب الخليط من غير غطا على النار لمدة ساعة تقريبا مع مراعاة التقليب
بعد كده نسيب الخليط يبرد ونضربه فى الخلاط جامد..وبعد كده نرجعه الحلة ونضيف السكر...
نضعه على النار مرة اخرى ونقلب حتى يذوب السكر ونوطى النار ونسيبه تلت ساعة او حتى يتكثف
نصبه فى برطمان ساخن معقم ونغلقه باحكام ويترك يومين قبل الاستخدام