make mahalabia dessert recipe in arabic
المقادير للمهلبية البيضاء بالشوكولاته :
3 ملاعق نشا
1 لتر حليب كامل الدسم
فانيليا او ماء زهر
ملعقتين كاكاو خام او نسكويك بس ناخد بالنا من السكر عشان النسكويك مسكر
6 ملاعق كبيرة سكر
الطريقة :
1- هاحط لتر اللبن فى حلة واسيب 1/4 كوب منه فى كوباية
2- هخلى اللبن يدفى بس على النار واطفى النار واقلب السكر فيه كويس
(وطبعا اللبن ده كان مغلى قبل كده ولو مبستر مش مهم يتغلى)
3- هدوب النشا والكاكاو فى 1/4 كوباية اللبن اللى ركنتها على جنب على البارد
4- هصب خليط النشا والكاكاو واللبن فى حلة اللبن وانا بحب اصفى وانا بصب عشان لو فيه اى بواقى نشا
مش تكلكع وانا بشتغل واقلب كويس وافتح النار تانى بس على الهادى
وطول ما انا واقفة اقلب وبحب اقلب بالويسكر (المضرب اليدوى بتاع البيض)
5- اول ما هتبدا تعمل فقاقيع كده اقلب كويس واجيب معلقة واعمل اختبار المعلقة
كلكم عارفينه اللى هو احط المعلقة فى المهلبية وارفعا واعمل خط بصباعى فى ظهر المعلقة
يفضل الخط واضح والمهلبية مش تسيح عليه يبقى كده المهلبية استوت والحمد لله
احط نصف ملعقة صغيرة او اقل فانيليا
ولو بتحبوا ماء الزهر بيبقى احلى واحلى
ملعقة كبيرة كده واقلب واطفى النار
6- اسيبها تبرد شوية واجهز الكاسات واصب مهلبية الشوكولاته واسيبها تبرد
وبعدين احطها فى الثلاجة
نيجى بقى للمهلبية البيضاء
نفس المقادير ما عدا الكاكاو مش ها نحطه
ونفس الطريقة برضه
وبعدين اسيبها تبرد كويس فى الحلة
واكون طلعت الكاسات اللى فيها مهلبية الشوكولاته
وبعدين اصب المهلبية البيضاء
فوق مهلبية الشوكولاته
واسيبها تبرد وبعدين ادخلها الثلاجة
ودى صورة المهلبية لما طلعتها من الثلاجة
وبعدين ساعة التقديم زينت المهلبيه بجوز هند وقرفة ناعمة ومكسرات مجروشة وزبيب
ودى كمان صورة للمهلبيه
