عنوان الوصفة: مسقعة باذنجان سهلة بالصور . اضيفت بواسطة : مسلمه حبيبة الرحمن . بتاريخ: 12/01/2016.
طريقة عمل مسقعة باذنجان سهلة بالصور
مرة أكلت مسقعه عند صاحبة ماما تحفه
طعمها جميل بجد بس كانت متغيرة عن ألى أنا بعملها على فكرة جوز صاحبة ماما ده شيف وهو ألى قالها عالسر وفضلت وراها لحد ماعرفت السر وجبتهولكم وبجد هى حاجه بسيطة بس بتفرق فى الطعم كتير أوى عملتها كذا مرة فى عزومات مع السمك والناس بيتهبلوا عليها بيقولولى طبق مسقعه زى السكر والطبق بيتمسح ولله الحمد
مقادير المسقعة بسيطه
نص كيلو باذنجان مكبب أو أكتر حسب ماتحبى
تلاته أو أربعه قرون فلفل
نقطتين خل
خمس فصوص توم مدقوقين
عصير خمس طماطمات متوسطين
ملح
فلفل أسود
والسر بقى
هنسمى الله ونجيب نص كيلو باذنجان مكبب وألى يحب يقشره ماشى وألى هتسيبه بقشره ماشى وهنقليه
وده بعد ماخلصنا قلى
وهنقطع الفلفل بردوه ونقليه
وبعدين ندق فصوص الثوم ونحطهم على النار مع معلقة زيت
وأول ما ريحته تطلع هنحط نقطتين خل
ونكون عصرنا الطماطم ونحطها عالتوم
السر بقى هنحط طرف المعلقة سكر يعنى أقل من ربع معلقه
وبعدين الملح والفلفل الاسود تمام كده
ونسيبها تتسبك وبعد ماتتسبك هنحط الباذنجان والفلفل المقليين لمدة دقيقتين تلاته على نار هاديه عشان طعم الصلصه يتشرب فيهم
هنقلب تقليبه واحده بس عشان مايتهراش
ونسمى الله ونحط المسقعة فى طبق التقديم
وده صورة المسقعة من غير فلاش
شايفين ألوان الطبق حلوة أزاى ولا طعمه بقى
وزوم
أكله مسقعة جميله ومش مكلفه وممكن نعملها جنبها طبق بطاطس محمرة ويبقى أحلى غدا وبألف هنا
أنا طمعانه فى دعوة حلوة بالذرية الطيبه والرزق الواسع لزوجى
فى أمان الله