حقول لكم السرالخطير اللي العالم كله يسالني عن طريقته ،، ورق العنب اللي اسويه
والله ياخواتي كل من ذاق ورق العنب قال ل كيف طعمه كذا وكيف تسوينه ،، ادمنو عليه
واحسن من احسن مطعم والله على ما اقول شهيد،،
قلت خلني افيدكم مثل ما استفدت منكم
مقادير حشوة ورق العنب :
2 كوب رز مصري
1 باقة بقدونس
نص باقة كل من كزبرة (لو ماتحبي طعمها استغني عنها)
نص باقة نعناع
نص باقة شبنت
2 جزر مبشور ناعم
1 فلفل اخضر مفروم
3 بصل كبير او 4 وسط او 6 لو صغار مرة
4 طماطم كبار او 6 وسط او 8 لو صغار
نص صلصة طماطم
1 ونص ملعقة ملح صغيرة
2 ونص م ص ملح ليمون ولاتصيرو بخيلين لووول
م ص بهار مشكل
نص م ص كل من : قرفة - كزبرة - كمون
ربع ملعقة كل من ففل احمر - فلفل اسود
4 عصير ليمونات
4 م ك دبس رمان
والسر 2 م ك سكر بس مو مليانين
اخلطو معاه ربع كوب زيت زيتون وصدقوني مو قليل وانا بقول لكم ليش لان لو كثرتو زين بالحشوة البهارات والملح والمنكهات ماتبان بالرز لان الزيت يعزل الطعم
المهم اخلطوهم وحطوهم على النار وحطوهم على نار عالي وقلبوهم لايلزق الرز بقاع الطنجره لما تحسو الماي بقى منه شوي بس مرة طفو لاتخافو والحشوة تبرد الرز بيشرب كل الماي
في ناس تحب تطبخ ورق العنب بماي حشوته وانا مانصحكم لان طعم الخضار تعطي ساعات طعم مرة واختلاط النكهات بعد ساعات تخرب طعم ولون ورق العنب
الحين استوت حشوتنا وحشو فيها ورق العنب عادي
ملاحظة :
لو ورق العنب كبير قصيها نصين عشان الحشوة تغلب على الورقة وتكون ورقة العنب في الكل لينة وتقطع بسرعة
طيب نجي طريقة الطبخ وركزو معاي
افرشي الصينية بطبقة قصدير وخليها تزيد معاكي وارجعي بعد حطي طبقة ثاني وخلها زيادة لان بنغطي فيها ورق العنب
افرشي الصينية اللي مفروشة بالقصدير ببطاطا شرايح،، مهم جدا لان ورق العنب مالح ولو ماعملتي هالخطوة ورق العنب بكون جدا مالح فالبطاطا يمتص اي ملح زايد
بعدها صفي ورق العنب انا افضل طبقة وحدة وحطي فوقه هالخلطة
م كبيرة دبس رمان مع عصير ليمونة مع م ك مليانة كاتشب مع 3 ملاعق كبار زيت زيتون بس مو تكثرو زيت زيتون
ولاتخافو حنجي لزيت الزيتون بعدين ؛؛ طبعا لاتنسو لاتحطو ملح ابدا بهالمرحلة
بس وغطي ورق العنب بالقصدير باحكام
الحين في قاع الصينية تحطو ماي طبعا بيكون الماي معزول عن ورق العنب بقصدير واللي يبي يحط الصينية بحمام مائي براحته بس انا احط الماي تحت القصدير وكذا استخدم صينية وحدة بس وبنفس الوقت يستوي ورق العنب على حمام مائي
الحين حطوه على النار
بس يغلي الماي تحت القصدير نزلو الحرارة لاق شي ولو عندكم عازل بعد احسن وخله ساعتين يستوي على راحته ولو تبخر الماي زيدو ماي فشيكوه كل شوي وطبعا هالشغل على الفرن من فوق مو داخل الفرن
انا ماحب داخل الفرن ياخذ وقت طويل ومودايما النتيجة تجي زي ما ابي
بعد ساعتين لاتفتحوه ولاعليكم منه خلوه على جنب حتى يفتر ،،
بعدها على الثلاجة على طول لاتفتحوه الا لما يبرد مرة
ليش كذا تضمني اللون مايتغير ،، وكمان تماسك ورق العنب حقك
بعد مايبرد وتفتحيه
اعصيري فوقه ليمونة كاملة
والحين نحط زيت الزيتون ،، انا ادهنه كله بزيت الزيتون يعطيه لمعة وطعم مرة لذيذ لان زيت الزيتون يكون طازج وطعمه مو متاثر بالطبخ
وبس
وقدموه وبالصحة والعافية اتمنى اكون افدتكم ان شاء الله