موسوعة الطبخ

عنوان الوصفة: طريقة عمل الجريش . اضيفت بواسطة : ديني كياني . بتاريخ: 07/08/2019.

طريقة عمل الجريش بالصور

صورة الجريش

السلام عليكم ورحمة الله وبركآته .. بنزل لكم طريقة الجريش اللي توارثتها عن امي اللي توارثتها عن جدتي ..
وبمآ أن أمي سديراويه فجريشهم هو أحلى جريش ..
مو لأنه جريش مآمي
بس لأنهم يستخدمون الحليب مو زي الأغلبيه يستخدمون لبن ..
الحليب يعطي الجريش طعم كريمي واللبن طعم حآمض ..

وبنستخدم في وصفتنا مكونين بتخلي جريشك لذيذ وصدقيني الكل بيحبه << الحين كل عماتي صارو يسوون نفس طريقة مآمآ ومآمآ صآرت مشهوره بجريشها اللذيذ << كأن البنت قآمت ترفع بأمها بس يحق لي أمي

المهم أن الشي السري اللي بنحطه هو [ الحليب + القشطه]
ومره مآمآ حطت كم حبة جبن كيري طلع الطعم قآآتل

طبعاً القشطه مستحدثه ولكن الحليب وصفة أهل سدير تقول كذآآ ..
جدتي أغلب الأحيان تسويه بحليب الغنم طآزج من مزرعة جدي
المهم أني مآ أحب ألآ جريش جدتي + مآمآ + أنآ
وجريش المطآعم مآ أحبه منوب منوب
وأحب آكل الجريش وهو توه مخلص مو مسخن ..
طيب نبدأ في الوصفه << صبآح الخيير

المكونآت لعمل الجريش :

- صدر دجاجه

- 3كاسات جريش منقوعه

- نص كآس رز مصري << يعطي لون أبيض وإذا حآبه تستغنين عنه بدليه بـ ربع كاس جريش

- مكعبين مآجي

- حبة كبيره أو حبتين وسط بصل [ الأبيض أحلآ وهو أصلاً للطبخ أفضل من الأحمر لأن الأحمر حآلي ]

- كمون

- علبة قشطه فمآ فوق [ كل زدتي القشطه كل مآكآن الطعم أحلآ ،، أنآ أضفت قشطة الطيب القشطه الطازجه اللي بالكيلو 250 جرآم ]

- 3 لتر حليب

- كآس من مرقة الدجاج

[ لك الحريه باختيار السوائل سسوآء + مآء + مرق + حليب + لبن لكن بوصفتي شرط أساسي وجود الحليب وبكميه كبيره ،، أنآ أضفت الحليب لتر واللبن لترين ومرقة الدجاج كآس << لأن كان عندنا لبن كثر بالشين فييه فطلع الطعم خطيير يعني ممره لذيذ ويذوب بفمك وفيه لذعة حموضه بسيطه مو زي الجريش العادي حامض حامض !! ممكن تستخدمون حليب البودر بعد ماتحضرونه زي ماهو مكتوب عليه ممكن حتى الزبادي تستعملونه أهم شي شي من منتجات الألبان حتى الجبن المالح ماما قد جربته .. فالابتكار يولد لكم نكهات جديده ومميزه وهو اللي بيميزك عن غيرك هالطعم الغريب بأكلك والسر أنك تدخلين شي الناس مو متعوده وجوده ]
والله أحسسكم بتناحاشون كل ذا ولا بديت في الوصفه
بسس شسوي ممقدر أسكت

طيب نبدأ بطريقة التحضير لعمل الجريش :

أول شي أنقعي الجريش ..
طبعاً نقع الجريش يختلف حسب الحبه ،، الحبه الصغيره تحتاج وقت أقل والحبه العآديه وقت أكثر ..
أحنا حبيتنا وش زينها حجمها وسسط فأخذت ساعتين ونص وهو وقت كافي ..
كل مابغيتي السليق يكون أنعم أكثر ومهروس أو مدري وش يسمى طولي بنقعه ..


هنآ جريشي منقع ووش زينه وكل حبه تناديني تقول عجلي علي اطبخيني غمسيني في الحليب والأوشطه أبغى أذوب فيهم
طيب الرز الحين منقوع وجآهز ،، نسلق صدور الدجاج والكميه على حسب رغبتك يعني نسبة الدجاج بالجريش تحبينها كثيره كثري ..
أنآ كنت مسويه دجاج محمر لأن أهلي يحبونه فحطيت بس صدر ممكن تحطين لحم وممكن بدون ششي وتستغنين عن مرقة الدجاج بمويه عاديه ..

[ ملآحظه : الأغلب يعرفها بس يمكن فيه وحده ماتعرفها .. أثناء سلق الدجاج فيه شي أبيض فوق طافي ( من يطفو )
بعد ماتسلقين الدجاجه وتكونين مملحتها طبعاً تآخذين كاس من مرقتها وتضيفينه في القدر اللي بتطبخين فيه الجريش .. والباقي خليه على جنب << بعدين أقولكم وش بنسوي فيه ..

ونضيف الحليب للقدر
[ أنآ أضفت اللبن بما اني استخدمته ولو كنتي تحبين الجريش يكون كريمي أكثر زي مآ أحب استغني عنه لكنه يعطي لذعة حموضه بسييطه ]

ونضيف البصل المفروم .. والملح ،، والماجي ..

[ هنآ ممكن تضيفين الزبده لكن أنآ حسيتها دسمه كفايه لكن إذا تبين حطي مافي مانع ]

لما يغلي الخليط الميلكي نضيف حبات الجريش ونحرك عشان يتداخل الخليط الميلكي مع الجريش ..

واللي تحب نكهة وريحة الفلفل تضيفه ..

ولا تخافون حركو وانتم مغمضين لأن الجريش مو مثل الرز مانبيه يعجن ..

ونضيف معه الدجاج أو اللحم واذا ماحبيتي مب لازم ..

ومجرد مايرتفع الجريش نخفض النار ونحط تحت القدر حديده .. عشان تخفف النار وتوزع الجراره بشكل متساوي ..

وأثناء الاستواء اختلفت الروايات .. جدتي تخليه وماتفتحه وماما بين وقت وثاني تحركه عاد انتي وراحتك لكن اذا اول مره بتسوين جريش ممكن بين وقت وثاني تطلين عليه ..

لما تحسين الجريش بدا يثقل ولكنه فيه سيلان يعني لاهو شوربه ولا جريش عادي ممكن تخلينه يكمل استواءه على النار ..
أو ممكن زي ما جدتي وامي يسوون يدخلونها الفرن ..



شفتو الحديده السودا اللي هي طاوه .. هذي اللي قلت لكم عليها ..
وترا وجوده بالفرن مو ذاك الشي الأساسي مره يعني يمكن الاستغناء عنه ..

وفيما أن الجريش يطبخ خنروح نجهز الكشنه ..

مقادير الكشنه فوق الجريش :

بصل

حبات من الليمون الأسود المجفف [ اللومي ]

بودرة الليمون المجفف

مقدار من مرقة الدجاج اللي رفعناها أول .. وممكن مويه عاديه اللي يريحك ..

قلييل من الزيت
تحمسين البصل بالزيت وبعدين تضيفين المويه
[ مقدار المويه على حسب انتي شلون تبين الكشنه ثقيله ولا خفيفه عموماً لحبة البصله الصغيره استخدمي مالايقل عن ربع كاس ]
وأضيفي الليمون الناشف وبودرته ..
ولو تبين كم حبة فلفل مافيه مانع ..
وتخلينهم ينطبخون لمآ تحسين أن البصل ذآآب من قلب ..
<< هنا ممكن تحطين مكعب ماجي ..
ومآ أنتهينا ..
بآقي أحلى مرحله بالنسبه لي اللي هي اضافة القشطه
أفضل شي تكون قبل التقديم ..
نضيف القشطه والكمون ونطلع الدجاجه من الجريش ونفتتها ونبدآ نخلط أو بالأصح نعصد ..
تعرفون المعصد الخشب هذا أقدره وأحسه أساسي بطبخ الجريش ..
حنا حقنا توه منكسر ..
[ لآ تخآفون مو مني لوووول ]
فعصدت بمغرفه ولا كان صورت لكم هالمرحله الجميييله << على طآري الصور كثير صور ماحطيتها حسيتها ماتخدم الموضوع بس زياده على الفاضي مع اني رفعتهم وكل شي ..
المهم الحين صار عندك ألذ و أحلى جريش ..
وأحس لو كنتي فنانه ممكن تحطينه بالعشا مع اطباق مو شرط تكون شعبيه لأني أحسه بالحليب يكون لذييذ ورآآيق ..

صور الجريش المملوح .. << معجبه بجريشها ..



أيضاً الجريش لو نظرتي له بمنظور صحي وحبيتي تطبخينه بصحيه أكثر بيكون الموضوع جداً سسهل ..
وكون الجريش يحتوي على الكثير من الألياف هذا بيخليه يمنع امتصاص الدهون ،،
وغير أنه ملييئ بالكالسيوم بسبب وجود مشتقات الحليب والبروتين ايضاَ ..
ولو كنتي ماتحبين كل انواع اللحوم ممكن تحبينه بالراحه .. [ كنت بقول نباتيه لكن ماشاء الله الجريش مليء بمشتقات الألبان ]
طبعاً الجريش لاتخلو منه أغلب عزآيمنا ..
بس أنآ مو من محبينه ممره << أجل وش كل ذاك المدح
لأن الصراحه مو كلاً يظبطه مو مدحاً في وصفتي لكن للأسف بعض الناس تكرهني فيه [ يمكن هم يحبونه كذا لكن أنآ مايجوز لي ]
ويكفيني أن بابا اليوم كل صحنيين [ بالعافيه يآ أبوي الغالي ] أنبسطت وأنآ أشوفه يآكل ..
خصوصاً هو يحب أني أطبخ أكل دسسم ويقولي كل مآ أسوي حلويات وكب كيك :
أنآ ودي يابنيتي تسوين الأكل الدسم هو اللي بيفيدك بعدين أمآ الحلآ كلن يقدر يسويه ..
بكرآ إذا رحتي بيت رجلك ولآك تطبخين له ذآك الأكل الزين يدلي يدعي لنآآ ..
<< ترآ هذا كله كلام بآبآ وانآ أوجهه لكل بنوته نيابة عن بابا .. << مين وكلك
وترآ لآيغركم كثرة كلآمي الجريييش جداً سسهل أسهل مما تتصورون وأنآ مشكلتي كلامي كثير ولا أقدر أختصر لكم في 10 أسطر ..
واللي تبي ملخص الوصفه عشان تحل الواجب ترسلي ع ـآلخاص
وحلو واجباتكم أول بأول لأن الدرس الجاي بيكون عن المقلوبه << مسويتها من زمان بس نزلت الجريش قبل لأنه أكله سعوديه فالأقربون أولى بالمعروف

الموضوع جآآ كذآآ بسرعه وكتبته في لحظته فعذروني على القصوور ولكل وحد قرت موضوعي كآآمل ..
والله أنك بطله ..
سواليفي كثيره ومع ذلك قريتيهآ ولذلك أكييد أنك إنسانه مب كسوله نهائياً فشرآيك تغدين أهلك بكرآ جرييش .. << مآ أنعطى وجهه بس والله أطمع في أن مبدعآت مثلكم يطبقون وصفه متواضعه لي [ تدهن السير ]
وعلى موضعي تحسوني كأني أنآ وجدتي ومآمآ اللي مبتكرين الوصفه ..
أيضاٌ أغلب السعوديين والخليجيين تقريباً يعرفون الطريقه لكن فيه عرايس وفيه حلوات مايعرفون الطريقه والبعض مآ قد جربه ..

مواضيع ذات صله عن طبخ وعمل الجريش

طريقة عمل جريش القصيم من مطبخي بالصور

كيفية عمل الجريش السعودي من مطبخي بالصور

الجريش بالدجاج بطريقة فروحة الامارات بالصور خطوة خطوة

عمل الجريش بالصور من طبخات دهران

جريش بالشوفان بالصور

جريش ورد تميم

طريقة الجريش النجدي الملكي بالصور

عمل الجريش من وصفات طبخ مشاعل الطريفي

عمل جريش احمر باللحم بقدر الضغط الكهربائي عبير العميرة

الجريش اللذيذ بالدجاج

جريش من المطبخ السعودي{بالخطوات المصوره}

الجريش أو اليريش البحريني