موسوعة الطبخ


عنوان الوصفة: طريقة تجفيف الخضروات الورقيه بالصور . اضيفت بواسطة : بحب بلدي . بتاريخ: 08/05/2012.


 

طريقة تجفيف الخضروات الورقيه بالصور
سوف اقدم لكم ترتيباتي قبل شهر رمضان اللي بتوفر عليا شغل كتيير وبعمل آكلات حلوة وفي وقت قصير
اولاً
طريقتي في تجفيف كل الخضروات الورقيه
والصراحه الحاجه ام الاختراع
نظراً للسفر الدائم لابو الشباب
وكمان أنا بحب كل شئ في بيتي يكون موجود
والحمد لله ع النعمه
ربنا يحفظها من الزوال
ولذلك فكرت ف تجفيف البقدونس والكسبرة
والشبت والنعناع طبعاً معروف
لكن الطريقه دي من ابتكاري ومحدش قالي عليها
ودا ميمنعش ان في ناس تانيه تكون بتعملها
ولكن أنا قلت طيب إحنا بنجفف النعناع
طيب ايه الفرق بينه وبين باقي الخضروات الورقيه
وبالفعل كانت النتيجة هايله وسهلت عليا أشياء كتير وممكن اطبخ اي طبخه وانا عارفه ان عندي مكوناتها
المهم الطريقه
بغسل البقدونس والكسبرة والشبت حتي الملوخيه كويس جداً وعلي فكرة بقطفهم يعني بأخذ الورق بس
واحطهم في المجفف وبعدين افرشهم في صينيه وتحتها فوطه نظيفه او الورق الخاص بالمطبخ ليمتص المايه واخليهم في المطبخ
ينشفوا علي راحتهم
لأني لو حطيتهم ف الشمس لونهم هايتغير
ويبقي اصفر
ولكن بالطريقة دي بيحتفظ بلونهم الاخضر حتي بعد التجفيف
وبعد ما ينشفوا خالص بفركهم براحة ايدي
واحفظهم في علب وع الثلاجه
ودي الصور توضح
هنا الكزبرة


http://i.imgur.com/UQz1R.jpg


http://i.imgur.com/eqm8c.jpg


http://i.imgur.com/3nIWH.jpg


http://i.imgur.com/WzIAT.jpg

http://i.imgur.com/Lk98K.jpg

وهنا النعناع والنعناع بخليه ذي ماهو من غير طحن
http://i.imgur.com/2DJnG.jpg

وهنا الملوخيه
http://i.imgur.com/6ZMjS.jpg
وهنا بعد ما حفظتهم في العلب


http://i.imgur.com/7uUGo.jpg
نيجي بقي لاستخداماتهم
بستخدمهم في كل شئ
لو جالي ضيف فجأه وحبيت اعمل كفته او كباب ومعنديش الطازج بحط من الشبت والكسبرة وبيدي نفس النتيجة
وحلو جداً ف تقلية الملوخيه اللي هي الكسبرة طبعاً وعلي فكرة بتفضل محتفظه بلونها الاخضر


http://i.imgur.com/mEC6Z.jpg


http://i.imgur.com/1knXM.jpg
والريحه ياسلام تدوووخ
وكمان ف المحشي


http://i.imgur.com/YsHAR.jpg

وف حشو الفطائر
http://i.imgur.com/ACGps.jpg

وانا عندي بنتي مش بتحب الملوخيه الخضرا
بتحب الناشفة بس
ولذلك جففتها وطعمها حلو ومختلف عن الخضرا
وكمان بستخدم الكسبرة في القلقاس روووعه
يعني باختصار في كل حاجه
وف نفس الوقت ببقي مطمنه وانا عارفه انها موجودة عندي ف الثلاجه
نيجي بقي لترتيباتي لشهر رمضان الفضيل
اولاً

نا والديب فريزر والميكرويف اصحاب
منقدرش نستغني عن بعض. ههههه
بمعني بعمل كل حاجه واحفظها ف الفريزر واطلع واطبخ
مثلاً
أنا بشتري الخضار بكميات كبيرة الي حد ما
الطماطم باخد المستوي فيها واغسلها واقطعها وافرمها ف الخلاط واحفظها ف علب وع الفريزر
وبكدة تبقي عندي الطماطم جاهزة
لو حابه اطبخ اي خضار
ودي الصور


http://i.imgur.com/TVZ0p.jpg
ثانياً
صوص البيتزا بجهزة واحطه ف علب وع الفريزر ووقت ما احب اعمل بيتزا بيكون عندي الصوص جاهز
ودا بيختصر عليا الوقت ف رمضان
وان شاالله أحط طريقتها في موضوع خاص بالبيتزا


http://i.imgur.com/TtLuV.jpg
ثالثاً
الثوم بقشرة وافرمه واحطه ف الفريز
كمان بيسهل عليا الشغل
وساعات بجففه واطحنه وبستخدمه ف التتبيلات بيكون حلو قوي
ودي صورته بعد ما طحنته


http://i.imgur.com/L8HOC.jpg
رابعاً
البانيه
بتبله واحطه ف الدقيق والبيض والبقسماط واحطه ف أكياس وع الفريزر
ويبقي جاهز ع التحمير فقط وبس وكل اللي ها اعمله شويه مكرونه ويبقي الفطار جاهز عندك في اقل من نصف ساعه


http://i.imgur.com/x9GwJ.jpg
خامساً
بالنسبة للدجاج
بغسله وأقطعه ع حسب الاستخدام
يعني لو هااحشي الدجاج بغسله ذي ماهو واصفيه من المايه واحطه ف أكياس وع الفريزر
لو ها اعملها صينيه او دجاج مشوي بتبله واعينه ف الفريزر متبل جاهز ويبقي يادوب ع التسويه
ودا كمان بيوفر وقت كبير ف المطبخ
سادساً
وكذلك الفلافل ( الطعميه) بفرمها واجهزها واحطها ف أكياس وع الفريزر
وتبقي جاهزة للتحمير ع السحور


http://i.imgur.com/bO1Fi.jpg
وكذلك الفول ملك السحور
بدمسه ف البيت لأني مش بحب العلب الجاهز
واحطه ف علي وع الفريزر


http://i.imgur.com/WFJuS.jpg
وثامناً
اللحم المفروم
بجهزة للكفته
يعني اشكلها واحمرها واحفظها ف الفريزر
وتبقي جاهزة يادوب بس احطلها صوص الطماطم وتبقي عندي كفتة داوود باشا جاهزة ف ثواني


http://i.imgur.com/lPUFk.jpg
وتاسعاً
السمبوسه ملكة المائدة ف رمضان
بحشيها
لحم معصج او دجاج معصج او جبن
والتلاته مع بعض واحفظها ف علب وع الفريزر ويادوب ع التحمير
ونيجي لسري الخطير والعجيب ف حفظ السمبوسه
كل واحدة فيكم لما تيجي تحط السمبوسه ف الفريزر وتيجي تطلعها أكيد أطرافها بتتكسر معاها
ولذلك ها اقولكم سر رائع
طريقتي بعد ما الف السمبوسه ارص طبقه من السمبوسه وادهنها بالزيت وبعدين أحط طبقه تانيه وادهنها بالزيت واحطها ف الفريزر
لما تيجي تطلعيها من الفريزر استحاله تتكسر منك
والصراحه الطريقه دي ريحتني جداً جداً
جربوها وانتوا ها تدعولي
عاشراً
الملوخيه الخضرا بقطفها واغسلها وافرمها في المفرمه بشويه مرق دجاج او لحم
واحطها في أكياس وع الفريزر واستخدمها في الطبخ ع حسب مااحتاجها
ودي طبعاً بتوفر عليكي وقت كبير جداً ف المطبخ
وبكدة نقدر نستغل الوقت في قراءة القرآن
وكثرة الصلاة وكذلك كثرة الدعاء
ربنا يتقبل منا جميعا
ويوفقنا لما يحبه ويرضاه
واللي استفادت من موضوعي
ارجو منكم الدعاء لي ولاولادي وزوجي
ولكم بالمثل
فلا تنسوني من دعواتكم الصالحة
في رعاية الله وامنه
والحمد لله الذي اطعمنا وسقانا وكفانا فكم ممن لا كافي له ولا مأوي
اللهم ولي علي مصر من يصلح
اللهم وحد صفوفهم
وأجمعهم علي طاعة الله ومنفعة الأمه
اللهم انصر إخواننا في سوريا
اللهم احفظ شبابهم
اللهم استر نسائهم
اللهم احفظ بلاد المسلمين أجمعين
اللهم استجب
آميين يارب العالمين


عودة الى وصفات الطبخ