رز برياني باللحم حيدر أبادي بالصور

رز برياني باللحم حيدر أبادي بالصور


المقادير ..

1 جيلة رز بسمتي ... (الجيلة معيار قوطي السميد الأحمر )

2 بيضة مسلوقة

القليل من الكاجو .. حسب الرغبة ..

شدة كزبرة مقطعة ...

شدة نعناع مقطعة ...

2 علبة من الروب

ملعقتين شاي من بهارات الجارام مسالا الناعمة (الجارام مسالا هم الهيل و المسمار و الفلفل الأسود و الجرفة مجتمعة)

مجموعة الجارام مسالا الكاملة و ليست الباودر (( راح اراويكم فالصور لا اتحاتون )

معجون الثوم و الزنجبيل ( 5 فصوص ثوم و صلب كبير من الزنجبيل .. مدقوقين مع بعض)

3 بصل أبيض كبير

2 حبة فلفل أخضر حار

2 حبة ليمون كبار .. بنعصرهم

كيلو لحم مقطع و منظف

نصف كوب زيت

1 ملعقة فلفل حار باودر

القليل من ماء الورد

شوية زعفران مذوبة في ماء حار .. ربع كوب ماء تقريبا

ملح

1 ملعقة صغيرة كركم باودر ..

1 ملعقة سنوت (كمون) ...

هاي المقادير من موقع الشيف ... و في إضافات من خلال الصور

................................................


نبدأ بالطريقة ....

أول شي نقطع البصلات الثلاث البيض على شكل هلال و نقليهم في زيت ساخن



و لما يحمر و يصير لونه ذهبي .. نرفعه من الزيت و نفرشه على ورق على يشرب الزيت



و هذا الفلفل الحار اللي يخلي الأكل حااار .. فاللي ما يبا لا يحطيه ..



شوفو هااي المقداير مجهزة



اللحم طبعا مقطع و مغسول و محطاي على شويه ليمون و ملح علشان يطير ريحته الغير مستحبه



و عقب نفور ماي و نحطي اللحم فيه



و مجرد ما يغلي ... راح تطلع رغوة رمادية .. هااي شلوها كلها .. نفس الصورة



و عقب ما تشلون الرغوة ... حطو هالبهارات الخاصة بتنكيه اللحم .. مجموعة الجارام مسالا كامله .. أعواد القرفة و المسمار و الفلفل الأسود و الهيل و القليل من الكركم ..



بعد اللحم ما ينضى و يصير ناضي ... انحطيه في وعاء



و انحطي على اللحم .. معجون الثوم و الزنجبيل



و انحطي عليهم النعناع و الكزبرة المقطعين



و هذا الورق الهندي



نحطيه وياهم




و بعطيم انحطي ثلث كمية البصل اللي قليناه فوق الخليط



و نحطي كل التوابل المذكورة فالمقداير فوق... من الكركم و الفلفل الأحمر و الكمون و الجارام مسالا الباودر و الكاملة .. و نضع مقدار 2 ملعقة صغيرة ملح



و بعدين انحطي الروب



و نعصر فوقهم الليمون



و نصب الزيت .. و ماء الورد



و نبرش عليهم القليل من الفلفل الأسود



و نخلطهم .. و نترك الخليط جانبا ...



[/SIZE][SIZE=4]الحين اني للعيش .... انتبهو معاي زين .. هالمرحلة وااايد مهمة ....

العيش راح نطبخه 40 فالمية و راح انشل نصه من الجدر .. و نكمل سلق للباقي لين 60 فالمية .. و بعدها نصفيه ... يجب ان لا يكون نضج 100 % ... لاننا راح نطبخه لمدة ساعة على البخار .. و البخار كفيل بتنضيجه بالكامل ... لاتنسون .. على مرحلتين و على كميتين وحدة 40 و الثانية 60 % ...

هنيه نحطي الماء المغلي و انصب عليه مقدار من الزيت علشان ما يلصق مع بعض



لما غلى الماء ... حطيت العيش المغسول و المنقوع منذ نصف ساعة ...



و بعدها رشيت الملح .. اهنيه لازم تتذوقون الماي .. لازم الماي يكون مالح .. و الا العيش راح يطلع ماصخ و تهم ..



شوفو هااي نصف كمية العيش المسلوقة 40 % فقط



و هاااي النصف الثاني اللي انسلق 60 %



الحين شو انسوي ... انييب الخلطة اللي سويناها مساعة .. و انحطيها فقاعة الجدر ...




و بعدها ... انيب العيش اللي انسلق لـ 60 % و انحطيه فوقه



و نفرشه زين ما زين ..و عقب نحطي الثلث الثاني من البصل المقلي



و عقب انييب العيش اللي انسلق لـ 40 % ... انوزعه فوق كطبقة ثانية ..



و عقب انحطي الكمية الأخيرة من البصل المقلي و انرش السطح بماء الزعفران المنقوع



و نحطي على أطراف الجدر عجينه من الماء و الطحين و نحكم إغلاق القدر لمنع تسرب البخار .. و هنا ضمنا اننا سنكمل الطبخ على البخار ... شوفو الجدر .. لازم يكون قاعدته عريضة و سميكة .. و لو كان مب سميك حطو تحته تاوه ... علشان اتزيد السماكة ....

و خلو النار متوسطة لمدة 10 دقائق ... و عقب خلوها خفيفة لمدة 50 دقيقة ...



اهنيه قطعنا البيض للتزين ...



هاذي النتيجة لما كشفنا الجدر بعد ساعة




و الحين بخليكم مع الصور ... فطبق التقديم












أتمنى ان الطبق الأخير عجبكم .. و نال رضاكم ...