فيليه سمك كنعد مقلي

فيليه سمك كنعد مقلي


فيليه كنعد مقلي لذيذ وقبل ما أكتب الطريقه راح أقولكم معلومه عن الكنعد :

الكنعد الكبير أفضل من الصغير يمتاز بأنه : مافيه قشور وقليل الشوك وطري جداً جداً لذيذ ..

الوصفة هذي سهلة وجميلة وتصلح كل يوم


- الطريقه :

١- طبعاً قطعة الفيليه اللي تشوفونها تكون نظيفه مايحتاج تغسلونها لأن لو غسلتوها راح الطعم !
يعني سمك الكنعد كامل ينظف ويغسّل بس قطعة الفيليه نفس الصوره مانغسّله .!

٢- أول شي ندعكه مضبوط بالليمون .

٣- نضيف البهارات التاليه ( كركم + كاري + رشة قرفه + كمون + زنجبيل بودره + ثوم بودره + كزبره مطحونه + ملح + خردل بودره + فلفل اسود واحمر ) .

٤- نغلفه ونخليه بالثلاجه اقل شي نص ساعه عشان تتداخل النكهات .

٥- نجيب دقيق ابيض نضيف عليه :( فلفل احمر مجروش + بقدونس مجفف + ورق ريحان مجفف + ملح ) ونضغط ع السمك عشان يمسك الطحين فيه .

٦- ( بياض بيض + شوي خل ) ونغمس السمك فيه .

٧- اخر شي نقلبه في لوز شرائح .. تقدرون تستبدلون اللوز بـ ( فستق او شوفان او خبز مطحون (بقسماط) أو كورن فليكس .. الخ )

٨- يقلى بزيت غزير حرارته متوسطه عشان يستوي على راحته تقريباً١٠دقايق تكفي .

٩- نطلعه من الزيت ونخليه على ورق يمتص الزيت.

١٠- نسوي الصوص سهل جدا جدا بزبدة لورباك تعطيه طعم ولذاذه:
مكعب زبدة من مكعبات زبدة لورباك نذوبها على نار هاديه مع حبة ليمون اخضر ( ابو زهيره ) + شوي ورق ريحان .

وعند التقديم :
نصب الصوص على قطعة السمك وبألف عافيه على قلوبكم