• EN
  • اشراف أم حاتم
موسوعة الطبخ معجنات وصفات اطباق و معجنات بالتوست sweet french toast recipe الفرنش توست الحلو

sweet french toast recipe الفرنش توست الحلو

بواسطة: LooLooy
تاريخ الطبخة: 22/02/2016

sweet french toast recipe الفرنش توست الحلو
http://www.encyclopediacooking.com/upload_recipes_online/uploads/images_sweet-french-toast-recipe-%D8%A7%D9%84%D9%81%D8%B1%D9%86%D8%B4-%D8%AA%D9%88%D8%B3%D8%AA-%D8%A7%D9%84%D8%AD%D9%84%D9%88.jpg

جبت لكم طريقة التوست الفرنسي المحبب للجميع ...من جميع الاعمار..... ليييييييييش ؟؟

~ لانه ~
حلو وسريع للاطفال ...سواء سناك في العصرية او افطار مغذي ...
وكمان منقذ ممتاز للتوست والخبز القديم اللى يكون ناشف وقاسي نوعا ما ..
ومناسب لكبار السن ..لانه سوفت وناعم .. وله خيارات واسعه في التقديم ..
ومقاديره قليله واحنا نقدر نخليه وجبة دسمه للى يحب الطعم الغني والكريمي وممكن نخليه دايت ويناسب اصحاب الحمية والاكل الصحي ..

اللحين نزلت لكم هالمقطع في اليوتيوب علشان تعرفون مدى سهولته ... والناس اللى مبتدئين في الطبخ يفهمون فكرته ..انها بسيطه وماتحتاج مهارة في الطبخ

المقطع الاول



المقطع الثاني



طبعا الفرنش توست نوعين حلو ومالح اليوم راح اتطرق للحلو فقط ...واي فرنش توست في العالم يحتوي على ( بيض + حليب + منكهات + توست )

المقادير لعمل الفرنش توست :

8 شرائح ( توست ابيض او بريوش او رغيف فرنسي )
2حبه بيضه + 2/1 كوب حليب طازج كامل الدسم ( اذا تبينه دسم وطعمه كريمي نحط ربع حليب وربع كريمه سائله )
2ملعقه صغيرة سكر بودرة + 1ملعقه صغيرة فانيليا
منكهات ( اختياري ) حسب طريقة التقديم :
(2/1 ملعقه صغيرة قرفة ناعمة أو 2/1 ملعقة صغيرة بشر برتقال او رشة هيل مطحون وزعفران (للي يحبون النكهه الخليجية خخخ )
للقلي : 1 ملعقه طعام زبدة + 1ملعقة طعام زيت ذره

الطريقة لعمل الفرنش توست :

نخلط البيض والحليب والفانيليا والسكر خلط جيدا حتى يختفي البيض ويمتزج تمام (مو مثل الشيف اللى فوق الله يصلحها خلط زي عدمه .. خخخخ ) ونحطه في صحن واسع ..واللحين يا أما نخليه كذا ساده او نضيف له النكهه المرغوبة ونخفق ..
نسخن الزبدة والزيت على صاج واسع بس انتبهوا لازم تكون الحرارة متوسطه لان اذا ارتفعت الحرارة واجد بيحترق البيض وماراح ينضج من جوا ويعطي نكهة مو زينه ابد ويضيع تعبك كله ...لازم يكون لونه اشقر وبس ..
واللحين نبدا نغطس شرائح التوست تمام في الخليط السابق ونحطه على الصاج ونقلب حتى يشقر ونقدمه ساخنا وبطريقة التقديم المفضله ...

خيارات طرق تقديم الفرنش توست :

http://www.encyclopediacooking.com/upload_recipes_online/uploads/images_sweet-french-toast-recipe-%D8%A7%D9%84%D9%81%D8%B1%D9%86%D8%B4-%D8%AA%D9%88%D8%B3%D8%AA-%D8%A7%D9%84%D8%AD%D9%84%D9%882.jpg

1/ هذى النوع السادة من الفرنش توست بدون منكهات ...مجرد رشيناها بشيرة البان كيك ..
2/ هذا النوع السادة من الفرنش توست لكن رشيناه بالسكر وقدمناه مع العسل والجبنه والفواكه ...
3/ هذى فرنش توست القرفة ..اضفنا قرفة لخليط البيض وورشينا الوجة بالسكر والقرفة وشيرة البان كيك ..
4/ هذى النوع خرافي للي يحبون القرمشة .. نستخدم الخليط السادة ونرشة بالكرون فليكس اللى( بالعسل او عادي ) المجروس ويرش بشيرة البان كيك او العسل ..
5/ هذى النوع الفرنش توست دايت ..استخدمنا التوست بر والحليب منزوع الدسم ورشينا اشوي شوفان على الوحه وندهن صينية بشوي زيت ونرصه فيها وندخله الفرن حتى النضج ويقدم مع الفواكه ... وسيرب الفواكه ..
6/ هذى النوع السادة من الفرنش توست ...بس عند التقديم نضع عليه قطع الموز وتوفي ..يم يم


شطائر الفرنش توست


http://www.encyclopediacooking.com/upload_recipes_online/uploads/images_sweet-french-toast-recipe-%D8%A7%D9%84%D9%81%D8%B1%D9%86%D8%B4-%D8%AA%D9%88%D8%B3%D8%AA-%D8%A7%D9%84%D8%AD%D9%84%D9%883.jpg

1/ هذى النوع نضع مع خليط البيض بشر البرتقال ... وعند التقديم نضع داخل شريحتين قليل من القشطه الطازجة ..و الوجة نرشة بمربى البرتقال ..
2/ هذى النوع السادة مجرد عند التقديم نحشو السانويش كريمة مخلوط معها قليل من صوص الفراوله المصنوع في البيت ..و الوجة يرش بالسكر وصوص الفراوله المنزلي طبعا ..
3/ هذى النوع السادة محشو بزبدة الفول السوداني المخلوطه مع قليل حليب نستله المركز المحلى .. وترش بحليب النستلة المركز المحلى ...
4/ هذى بالشوكلاته الكاسات (جلاكسي او نوتيلا ) يم يم ... نحشيها بالشوكلاته ونرشها بالسكر البودرة ...
5/ هذى محشوة بكريمة الجبن ( 2مكعب جبنة كيري او فيلاديلفيا + 1ملعقة صغيرة سكر بودرة + رشة فانيليا ) نخفقها مضبوط ونحشي فيها السندويش اولا وبعدين نغمسها في خليط البيض وهي محشية ونحمصها بالطريقة المعتادة ... وتقطع مثلثات صغيرة وترش بالسكر البودرة ..

6/ هذي نفس اللى فوق بكريمة الجبنة ولكن مانحشيها الا بعد ما تتحمص .. وترش بالسكر البودرة ...


وهـ بس تعبت ...
عسى ماقدمته من الفرنش توست ينال اعجابكم ويفيدكم ولو الشئ البسيط ...

.. وصلى الله وسلم على سيدنا محمد صلى الله علية وسلم ...


التقييم
شاركي معنا