• EN
  • اشراف أم حاتم
موسوعة الطبخ معجنات طريقة عمل العجينة للمعجنات طريقة العجن الصحيحة من مطبخ الشيف لطيفة مسعود بالصور

طريقة العجن الصحيحة من مطبخ الشيف لطيفة مسعود بالصور

بواسطة: الشيف لطيفة مسعود
تاريخ الطبخة: 22/06/2016

طريقة العجن الصحيحة من مطبخ الشيف لطيفة مسعود بالصور
http://i982.photobucket.com/albums/ae308/cce4ever/how%20to%20make%20a%20dough/78.jpg%7Eoriginal

السلام عليكم ورحمة الله وبركاتة

موضوع النهاردة ضخم جداً ومتشعب وأنا حاولت على قد ما أقدر اني أختصر وأشرح وأوضح . درس النهارة هو طريقة العجن الصحيحة او (إزاي نعجن) أو (كيف نعجن) (إزاي نعمل عجينة ناجحة) أو (إزاي ننجح في المعجنات)


طبعاً ما تتصورش كم الرسائل الخاصة والاستفسارات الي بتجيني رسائل باستفسارات وأسئلة تتعلق بالعجين سواء طريقة العجن نفسها او التقطيع او الخبز مش بس على النت حتى على أرض الواقع واكتشفت اني نسبة كبيرة جدا جدا من البنات بتعمل العجين كدة على البركة ومش بيبقو متأكدين من النتيجة يعني يا تصيب يا تخيب طب ليه . وحتى الناس الي شاطرة في العجين عندهم أخطأء كبيرة بتأثر بشكل كبير في النتيجة النهائية للمعجنات ,علشان مش بيتبعو أصول عمل المعجنات او ممكن نقول المهارات والمبادئ والأساسيات . بالاضافة إني منتدياتنا العربية تفتقد لدروس بتتكلم فقط عن يعني معظم مواضيع المعجنات هي مقادير وتشكيل وطبق نهائي لكن ما فيش شرح لمهارات وأسرار ومبادئ العجين علشان نبقى متأكدين في كل مرة ان المعجنات بتاعتنا حتبقى رائعة بكل ما تحملة الكلمة من معنى .

فبإذن الله قررت يكون الدرس إهداء مني لكل الزائرات يستفادو منو وسبق لي عرضه في احد المنتديات ولكن تستاهلونه


الدرس طويل نوعماً ومليئ بالاسرار والتكات والمهارات, فلازم تقرأي بتركيز شديد جداً جداً وحتكون محاور الدرس كالتالي :-

1- مدخل لعالم العجين
2- الطرق الصحيحة لقياس المقادير
3- تطبيق لعجينة العشر دقايق بالتفصيل
4- تطبيق لعجينة عادية
5- خصائص العجينة الناجحة
6- تقطيع وتشكيل وتخمير العجينة
7- الطريقة الصحيحة لخبز المعجنات
8- خصاص المعجنات الناجحة



1- مدخل لعالم العجين

مش حقول ولا حتكمل كتير علشان لسه الدرس طويل لكن كل الي اقدر اقوة للبنات الي بيقولو مش بنعرف نعجن او عمر العجين ما نجح معانا اني السر في اتقان العجن هو الممارسة والتطبيق المستمر, يعني كل ما تشوفي عجينة اقمسي المقادير على 2 وبعد كدة على 4 حيكون عندك ربع المقادر جربية . لاني مهما اديتك في الدرس ده من معلومات او مواضيع لناس تانين او دخلتي اليوتيوب برضو مستحيل تبقي شاطرة في العجين غير بالتطبيق والممارسة. حقولك حاجة صادفتني كتير جداً بالذات في مصر حقولهاك عن طريق القصة دي . أفتكر كنت في مصر من حوالي 9شهور كدة واتفقت مع صاحبتي تعدي عليا نفطر سوا قبل ما تروح لحماتها . فقمت بدري شوية عن معادي وعملت معجنات جبنة وزعتر علشان نفطر بيهم . المهم من غير كتر كلام فطرنا وصاحبتي اخدت لحماتها من المعجنات . بكلمها بعديها بكام يوم بتقولي حماتي اتجننت على المعجنات وبتقولي مش معقول صاحبتك دي قلبها ابيض وحنينة بالطريقة دي طبعا اختكم لطيفة انشكحت قلتلها ازاي وهي لا تعرفني ولا عمرها شافتني . فقالت لي من معجناتك علشان هشة وخفيفة وبتقول اني الي بتبقى معجناتها ناجحة بالطريقة الجميلة دي كدة يبقى حنينة ههههههه والغريبة اني سمعت الجملة دي كتير بس أثبت للكل عكس كدة تمام .وعرفتهم اني دي مبادئ ومهارات والكل ممكن يبقى شاطر واديتهم التكات والاسرار وبقو كلهم حنينين زي وشيفات في المعجنات ههههههه ابتسامة

http://i982.photobucket.com/albums/ae308/cce4ever/how%20to%20make%20a%20dough/1.jpg

الدقيق من أهم مكونات العجين علشان بيمثل 70% من المكونات . ولازم يا جماعة نعمل المعجنات سواء بيتزا او باتية او معجنات او كروسان بدقيق حلويات فاخر علشان بيفرق بطريقة رهيبة جدا جداجدا . ويفضل حفظ الدقيق في الفريزر ولما تعوزي تستخدمية طلعية . والنخل مهم جدا بالنسبة ليا بنخل الدقيق مرتين بمنخل ديق وده بيساعد في ادخال نسبة هواء كبيرة جداً .

http://i982.photobucket.com/albums/ae308/cce4ever/how%20to%20make%20a%20dough/2.jpg

وبعد ما تنخلي الدقيق تقومي جايبة رشة ملح لانها مهمة جدا جدا سوء في الموالح والحلويات كمان

http://i982.photobucket.com/albums/ae308/cce4ever/how%20to%20make%20a%20dough/2-2.jpg

2- الطرق الصحيحة لقياس المقادير
زي ما احنا عارفين في مقاسات كتيرة بنستخدمها في عيار الدقيق زي مج الشاي الي هي كوباية الماية والمج الكبير وكوباية القياس . مهم جداً لما تيجي تطبقي اي نوع عجينة تعرفي صاحبة الطريقة استخدمت اي نوع كوباية في القياس . وأكبر خطئين بنعملهم في اثناء قياس الدقيق هما:- ضغط الدقيق في الكوباية . وملئ الكوباية لنهايتها بحيث انها تبقى زي الجبل زي الصورة .

http://i982.photobucket.com/albums/ae308/cce4ever/how%20to%20make%20a%20dough/3.jpg

يا جماعة طريقة قياس الدقيق الصحيحة هي انك تجيبي معلقة عادية وتحطي الدقيق في الكوباية من غير ضغط بحيث انو ياخذ راحته وبعد كدة بحرف السكين تقومي مساحة الزيادة علشان يبقى الشكل ده زي الصورة . وفي بنات كتيرة بتغلط بانتها تملى الكوباية وتقولك العجينة طلعت ناشفة.

http://i982.photobucket.com/albums/ae308/cce4ever/how%20to%20make%20a%20dough/4.jpg

نيجي للمقادير الي نقيسها بالمعلقة . طبعاً في نوعين المعالق المخصصة للقياس او الmaguring spoon ومعالق الطعام العادية الي بناكل بيها والتانية الاصغر . والفكرة هي نفس فكرة قياس الدقيق لازم تكون ممسوحة عشان تدينا المقدار الصحيح ده بالنسبة للمعالق المخصصة للقياس

http://i982.photobucket.com/albums/ae308/cce4ever/how%20to%20make%20a%20dough/5.jpg


أما المعالق العادية . فبنملاها بطريقة انها ما تكونش ممسوحة اوي ولا مليانة وبتسرب كدة بنقيس الخميرة . ويفضل استخدام خميرة فورية جيدة . وممكن استبدالها بالخميرة البيرة الي بفضلها لما ببقى في مصر لانها أفضل من الفورية بكتير . واذا كنتي من النوع الي مش بيعجن بإستمرار فبنصحك انك تنشطي الخميرة قبل البدء يعني تحطي مقدار الخميرة ومقدار السكر الوراد في المقادير وتحطي عليهم شوية ماية دافية وتسبيهم لو اتخمرة يبقى الخميرة كويسة وشغالى .

http://i982.photobucket.com/albums/ae308/cce4ever/how%20to%20make%20a%20dough/6.jpg

وكدة بنقيس السكر . وبفضل يا جماعة نستخدم السكر الابيض المكرر مش السكر المصفر بالذات في الحلويات علشان بيفرق جدا جدا جدا .

http://i982.photobucket.com/albums/ae308/cce4ever/how%20to%20make%20a%20dough/7.jpg

وكدة بنقيس اللبن الباودر . المعلقة مش مليانة اوي ولا ممسوحة ولا في حاجة بتنزل منها .

http://i982.photobucket.com/albums/ae308/cce4ever/how%20to%20make%20a%20dough/8.jpg

3- تطبيق لعجينة العشر دقائق .

بما اننا حالياً في درس مفصل عن العجين لازم نطبق بشكل دقيق وموضح ومفصل ازاي نعجن يعني نشوف كدة كل مرة من مراحل العجن بتبقى ازاي . واخترت للمهمة دي عجينة العشر دقايق الي ضاربة لسهولتها ولجمال وروعة النتيجة . لكن يا جماعة تفتكرو ليه العجينة دي بقت المحببة والمفضلة عند الجميع .عارفين ليه ؟؟ لانها بتحتوي على اهم سر من أسرار صنع العجين وهو البدء بعجينة رخوة وصولاً لعجينة متماسكة . يعني المجموعة الاولى من العجينة بتحتوي على دقيق وخميرة لكن سائل رخو ودي بيسموها في عالم المعجنات (الخميرة وهي مزيج بين خميرة ودقيق متخمرين مع بعض)والدليل على صحة المعلومة دي هي انك لو جربتي تحطي كل مكونات المقادير وتعجينها مش حتطلع المعجنات هشة وخفيفة بنفس طريقة تخمير المجموعة الأولى. وده اهم سر لازم تعرفية وهو اني اي عجينة لازم نعلمها نبدأ بخليط رخوة ولزج يحتوي على الخميرة سواء متخمرة أو لا وبعد كدة نبدأ نضيف الدقيق ونعجن وده مش بس في عجنية العشر دقايق وحنشوف خلال الدرس تطبيق تاني لعجينة عادية علشان تعرفي قصدي بطريقة أفضل.

زي ما احنا عارفين عجينة العشر دقائق بتحتوي على مجموعتين . بنخلط مقادير المجموعة الأولى الي هي :-
2 معلقة خميرة فورية
2 كوب ماء دافئ
2 معلقة طعام سكر
2 معلقة طعام حليب بودر
2 كوب دقيق فاخر منخول
رشة ملح

وبعد ما نخمر المجموعة الأولى حنضيف عليها المجموعة التانية الي هيا :-
3 أكواب دقيق فاخر منخول
1/2 كوب زيت نباتي

وده تطبيقي السابق لها

دلوقتي حشرح طريقة عمل عجينة العشر دقائق بالخطوات المصورة مع التعليق والتكات . في البداية لازم لما نعجن مقادير المجموعة الأولى نخفقهم كويس جداً جداً بشريط خفق لحد ما المكونات تندمج كويس جدا جدا جدا وده حياخذ شوية وقت والمطلوب اني الخميرة تدوب كويس لانها بتاخذ وقت على ما تدوب وزي ما الصور موضوحة شوفي كدة على جوانب الاناء ما فيش نقاط خميرة او كور لبن بودرة

http://i982.photobucket.com/albums/ae308/cce4ever/how%20to%20make%20a%20dough/9.jpg

طبعاً حنخمر مقادير المجموعة الأولى كويس جداً لحد ماتظهر فقاعات هوائية وحجمها يتضاعف . ولو الجو بارد زي دلوقتي ممكن تاخذ منك وقت طويل يوصل ل20 دقيقة ما تقليقيش المهم انها تتضاعف زي كدة ولسرعة تخميرة نغطيها ونحط تحتها فوطة مبلولة ماية سخنة ونحطها في مكان مغلق زي الميكرويف مثلا او فرن مطفي . ولو الخليط ما تخمرش يبقى الخطأ واحد من حاجتين:-
1- الماية كانت سخنة جداً فموت الخميرة .
2- الخميرة مش كويسة وبايضة

http://i982.photobucket.com/albums/ae308/cce4ever/how%20to%20make%20a%20dough/10.jpg


بعد ما خمرنا المجموعة الأولى حننتقل للمجموعة التانية . وبما اني بصور درس فقررت انت اشتغل على الرخامة علشان تبقى واضحة والصعوبة كانت اني بعجن بالشمال وبصور وباليمين .

دلوقتي قسمت الدقيق بتاع المجموعة التانية لقسمين وهما 3 معالق حلم بيهم العجينة في النهاية والباقي حطيتة على الرخامة .

http://i982.photobucket.com/albums/ae308/cce4ever/how%20to%20make%20a%20dough/11.jpg

عملت حفرة في الوسط وصبيت المجموعة الأولى الي اتخمرت بالصورة دي علشان أبدأ أعجن بإيدي .

http://i982.photobucket.com/albums/ae308/cce4ever/how%20to%20make%20a%20dough/12.jpg

بصي باخذ من الدقيق الي في الاطراف ورجعتة لجوة

http://i982.photobucket.com/albums/ae308/cce4ever/how%20to%20make%20a%20dough/13.jpg

وهكذا باخذ من الاطراف وادخلها في النص

http://i982.photobucket.com/albums/ae308/cce4ever/how%20to%20make%20a%20dough/14.jpg

بصي بتلم ازاي علشان فرشت الدقيق الاول فعمل حاجز عن الرخامة وما خلاش خليط المجموعة الاولى يلزق اوي في الرخامة

http://i982.photobucket.com/albums/ae308/cce4ever/how%20to%20make%20a%20dough/15.jpg

ودي صورة اوضح لكل العميلة مجرد بس بدخل الدقيق جو الخليط السائل

http://i982.photobucket.com/albums/ae308/cce4ever/how%20to%20make%20a%20dough/16.jpg

هنا بقى عندنا 3 حجات (دقيق ناشف وعجين طرية بتلزق وعجينة متماسكة) ودي الي بيحصل خلال عملة العجن ومن عملية العجن بتندمج كل الحتت دي

http://i982.photobucket.com/albums/ae308/cce4ever/how%20to%20make%20a%20dough/17.jpg

بصي بدأت الملامح تظهر والعجينة تتشكل أهم حاجة انك ما تستعجليش وما تتضايقيش اني ايدك بتلزق ثواني وحتبصي تلاقي العجينة سابت ايدك خالص وبقت امورة قصدي انا الامورة

http://i982.photobucket.com/albums/ae308/cce4ever/how%20to%20make%20a%20dough/18.jpg

ده شكل العجينة من تحت لسه في دقيق على الرخامة وبحاول اجمعه علشان تبقى كتلة واحدة

http://i982.photobucket.com/albums/ae308/cce4ever/how%20to%20make%20a%20dough/19.jpg

بصي ايدي بلتزق لكن الرخامة بدأت تنظف ليه علشان انا بلم العجينة مش بعجن يعني العجينة من جوة بتلزق وطرية جداً لكن من برى متغلفة عجينة علشان عمالة ألمها على بعض.

http://i982.photobucket.com/albums/ae308/cce4ever/how%20to%20make%20a%20dough/20.jpg

ودي ايدي في المرحلة دي العجينة بتلزق بس بستمر في لم العجينة وتنظيف الرخامة من الدقيق باني الف العجينة عليها واجمع بيها الدقيق المتبعتر

http://i982.photobucket.com/albums/ae308/cce4ever/how%20to%20make%20a%20dough/21.jpg

كدة بدأ اجمع الدقيق الباقي على الرخامة وقطع العجين الصغيرة .

http://i982.photobucket.com/albums/ae308/cce4ever/how%20to%20make%20a%20dough/22.jpg

بصي هنا لازالت طرية من جوة لكن من برى عليها قطع عجينة ناشفة ودقيق

http://i982.photobucket.com/albums/ae308/cce4ever/how%20to%20make%20a%20dough/23.jpg

بصي قطع العجين الناشفة والدقيق

http://i982.photobucket.com/albums/ae308/cce4ever/how%20to%20make%20a%20dough/24.jpg

بفرول البقايا بسهوة من ايدية لكن خدي بالك لازالت في قطع بتلزق على ايدي يعني العجينة زي ما قلت لسه طرية وبتلزق من جوة ومتماسكة من برى

http://i982.photobucket.com/albums/ae308/cce4ever/how%20to%20make%20a%20dough/25.jpg

علشان تبقى فاكرة دلوقتي فضل عندنا اية حاجتين :-

1- الثلاث معالق دقيق الي شلتهم من مقدار الدقيق بتاع المجموعة التانية
2- مقدار الزيت

حنضيف الزيت النباتي على العجينة دفعة واحدة
http://i982.photobucket.com/albums/ae308/cce4ever/how%20to%20make%20a%20dough/26.jpg

http://i982.photobucket.com/albums/ae308/cce4ever/how%20to%20make%20a%20dough/27.jpg

حنبدأ نعجن الزيت مع العجينة بالصورة دي وحنلاحظ انو فصل حبتين لاني العجينة طرية والزيت بيزحلق ههههههه بس اعجني عادي لحد ما تلم مع بعض

http://i982.photobucket.com/albums/ae308/cce4ever/how%20to%20make%20a%20dough/28.jpg

بصي مع الاستمرار في العجن العجينة لمت عادي وطرية وجميلة

http://i982.photobucket.com/albums/ae308/cce4ever/how%20to%20make%20a%20dough/29.jpg

والطريقة الصحيحة للعجن هي تاخذي الاطراف وتحطيها جوة وهكذا

http://i982.photobucket.com/albums/ae308/cce4ever/how%20to%20make%20a%20dough/30.jpg

ده شكلها من تحت اثناء عجنها مع الزيت

http://i982.photobucket.com/albums/ae308/cce4ever/how%20to%20make%20a%20dough/31.jpg

بصي العجينة على جنب اهي استوعبت كل الزيت ولمت . لكن ما نعجنهاش اوي علشان الزيت حيندمج ويختفي تماما وحتبدأ تلزق وتضايقك . لا خليها كدة فيها لمعة والزيت يبقى ظاهر شوية . وحنجيب الثلاث معالق دقيق نفرشهم على الرخامة زي كدة ونحط العجينة عليهم ونبدأ نعجن

http://i982.photobucket.com/albums/ae308/cce4ever/how%20to%20make%20a%20dough/32.jpg


http://i982.photobucket.com/albums/ae308/cce4ever/how%20to%20make%20a%20dough/33.jpg

طريقة العجن الصحيحة زي ما قلت تدويس على الاطراف كدة وتاخذية لجوة

http://i982.photobucket.com/albums/ae308/cce4ever/how%20to%20make%20a%20dough/34.jpg

كدة بصي خدت الطرف ورجعته لمنتصف العجينة وهكذا

http://i982.photobucket.com/albums/ae308/cce4ever/how%20to%20make%20a%20dough/35.jpg


http://i982.photobucket.com/albums/ae308/cce4ever/how%20to%20make%20a%20dough/36.jpg

ده شكل العجينة من جوة طرية . حتفضلي تعجني بالطريقة الصحيحة دي لغاية ما الدقيق يختفي والعجينة تلم معانا . والهدف من العجن بالطريقة دي علشان احنا عايزين عجينة طريقة لكن مش عايزينها تلزق في ايدينا فالطريقة دي بتدخل الدقيق للطبقات الي جوة العجينة بالتدريب مع الحفاظ على ادينا نظيفة .

http://i982.photobucket.com/albums/ae308/cce4ever/how%20to%20make%20a%20dough/37.jpg

كدة الدقيق كله اختفى والعجينة لمت بشكل جيد لكن لسة سطحها مش أملس ومحتاجة تتخدم أكتر

http://i982.photobucket.com/albums/ae308/cce4ever/how%20to%20make%20a%20dough/38.jpg

بصي تتقطع لما بنشدها معنا كدة عايزة تتعجن زيادة . وطول العجين بيحسن من نتيجة المعجنات فيما بعد وازاي نعرف اننا عجناها كفاية من خلال :-
1- سطحها أملس ناعم
2- مش بتلزق
3- لو شديتها بتمط ومش بتتقطع بسهولة

http://i982.photobucket.com/albums/ae308/cce4ever/how%20to%20make%20a%20dough/39.jpg

باسم الله ماشاء الله هي دي النتيجة الي احنا محتاجين نوصلها . عجينة ملساء طرية

http://i982.photobucket.com/albums/ae308/cce4ever/how%20to%20make%20a%20dough/40.jpg

بصي ناعم أزاي

http://i982.photobucket.com/albums/ae308/cce4ever/how%20to%20make%20a%20dough/41.jpg

بندورها على ايدينا وممكن تستعيني برشة دقيق عادي

http://i982.photobucket.com/albums/ae308/cce4ever/how%20to%20make%20a%20dough/42.jpg

وده شكلها عن قرب طرية بس متماسكة

http://i982.photobucket.com/albums/ae308/cce4ever/how%20to%20make%20a%20dough/43.jpg

جاهزة لإستخدام ^_^ وأنا بصور اللقطة دي لقيت مرات أخوية داخلة المطبخ بتقولي احنا مروحين بصت كدة وبتقولي اية ده عجينة معلش بقى انا محتجاها حاخدها أعمل بيها باتية للعشاء ابقي اعملي بقى واحدة تانية ليكم . وأخدتها معاها وهي ماشية ألف هنا وشفا على سعود وحمادة ولاد أخوية

http://i982.photobucket.com/albums/ae308/cce4ever/how%20to%20make%20a%20dough/44.jpg

4- تطبيق لعجينة عادية

مهمة جداً اني اطبق عجينة تانية غير العشر دقايق علشان تعرفي اكتر وأكتر طريقة العجن الصحيحة . ودوقتي حستخدم عجينة عادية جداً مقاديرها من دماغي .


مقادير العجينة العادية :-

5 كوبايات دقيق
2 كوب ماء دافئ
50 جرام زبدة وممكن 1/2 كوباية زيت
1 معلقة طعام سكر
2 معلقة طعام خميرة فورية
رشة ملح
2 معلقة طعام لبن بودرة

http://i982.photobucket.com/albums/ae308/cce4ever/how%20to%20make%20a%20dough/45.jpg

زي ما قلنا في تطبيق عجينة العشر دقايق حنقسم الدقيق حناخذ جزء وهو نص كوباية دقيق على جنب علشان نلم بيها العجين بعدين . ونحط الباقي في اناء واسع للعجن

http://i982.photobucket.com/albums/ae308/cce4ever/how%20to%20make%20a%20dough/46.jpg

حنضيف المكونات الجافة (السكر والخميرة واللبن البودرة والملح)

http://i982.photobucket.com/albums/ae308/cce4ever/how%20to%20make%20a%20dough/47.jpg

ومهم جدا اننا نقلب المكونات الجافة كويس جدا جدا

http://i982.photobucket.com/albums/ae308/cce4ever/how%20to%20make%20a%20dough/48.jpg

ضفت مقادر الماية علشان نبدأ نعجن

http://i982.photobucket.com/albums/ae308/cce4ever/how%20to%20make%20a%20dough/49.jpg


http://i982.photobucket.com/albums/ae308/cce4ever/how%20to%20make%20a%20dough/50.jpg

هنا حعجن في طبق زجاجي علشان تشوفي برضو الطريقة بشكل واضح وهي هي نفس طريقة العجن الخاصة بعجينة العشر دقايق . هنا زي ما قلنا في البداية واحنا بنعجن حيبقى عندنا أماكن فيها دقيق ناشف لسه واماكن فيها عجين طري حنستمر في العجين .

http://i982.photobucket.com/albums/ae308/cce4ever/how%20to%20make%20a%20dough/51.jpg

كدة الماية اختفت تماماً وضروي زي ما قلت نبدأ بخليط رخو وطري وبيلزق وننتهي بعجينة متماسكة ليه بداية علشان مقدار السكر والخميرة يدوبو كويس جدا جداً وعلشان زي ما قلنا معجناتنا تبقى طرية بعد الخبز. من الخطأ ننا نحط مقدار الدقيق ونحط شوية ماية ونعجن لحد ما نحصل على عجينة ناشفة اوي ونبدأ نحط ماية ونطريها ده اكبر خطأ بنرتكبة في حق العجينة وبتفرق قوي في النتيجة النهائية للمعجنات ومش حتدينا درجة الهشاشة الي احنا عايزينها . بصي هنا العجينة طرية بس بتفصل ممنا علشان لسه محتاجة تتخدم وتتعجن

http://i982.photobucket.com/albums/ae308/cce4ever/how%20to%20make%20a%20dough/52.jpg

تابعي هنا في الصورتني بدأت مسك وتبقى لزجة شوية وتقيلة

http://i982.photobucket.com/albums/ae308/cce4ever/how%20to%20make%20a%20dough/53.jpg


http://i982.photobucket.com/albums/ae308/cce4ever/how%20to%20make%20a%20dough/54.jpg

بصي خشنة وسطحها املس ومحتاجة كمان تتعجن

http://i982.photobucket.com/albums/ae308/cce4ever/how%20to%20make%20a%20dough/55.jpg

هنا بدأ شوية تندمج مع بعض أكتر وأكتر

http://i982.photobucket.com/albums/ae308/cce4ever/how%20to%20make%20a%20dough/56.jpg

هنا بقت تمام التمام هو ده المطلوب . بصي السطح أملس ودققي كدة العجين الي على ايدي متماسك اوي يعني مافيش حتت وحتت تانية وحتى اللون بقى افتح من العجن

http://i982.photobucket.com/albums/ae308/cce4ever/how%20to%20make%20a%20dough/57.jpg

ايو الي فاضل من المقادير :-
1- فاضل مقدار نص كوباية الدقيق
2- الزبدة وزي ماقلنا ممكن تستبدليها بالزيت

http://i982.photobucket.com/albums/ae308/cce4ever/how%20to%20make%20a%20dough/58.jpg

حنحط مقدار الزبدة على العجينة الطرية ونعجنها لاحظي كدة الصور التالية

http://i982.photobucket.com/albums/ae308/cce4ever/how%20to%20make%20a%20dough/59.jpg


http://i982.photobucket.com/albums/ae308/cce4ever/how%20to%20make%20a%20dough/60.jpg


http://i982.photobucket.com/albums/ae308/cce4ever/how%20to%20make%20a%20dough/61.jpg

العجين لسه بيلزق جدا بس الزبدة خلته يسيب ايدي شوية لانها بتزحلق

http://i982.photobucket.com/albums/ae308/cce4ever/how%20to%20make%20a%20dough/62.jpg

بصي قوام العجينة في المرحلة دي عامل ازي

http://i982.photobucket.com/albums/ae308/cce4ever/how%20to%20make%20a%20dough/63.jpg

حنحط مقدار نص كوباية الدقيق الي شلناها من المقادير وحنبدأ نلم العجينة

http://i982.photobucket.com/albums/ae308/cce4ever/how%20to%20make%20a%20dough/64.jpg

في تطبيق عجينة العشر دقايق فرشنا الدقيق تحت وخليط المجموعة الاولى فوق . هنا علشان بعجن في طبق فإجباري حرش الدقايق على الوش . لكن وانا بعجن بحاول انزل الي على الجوانب الاول وادخل ايدي من تحت العجينة زي كدة

http://i982.photobucket.com/albums/ae308/cce4ever/how%20to%20make%20a%20dough/65.jpg

حتبصي تلاقي العجينة لمت واتغلفت بالدقيق

http://i982.photobucket.com/albums/ae308/cce4ever/how%20to%20make%20a%20dough/66.jpg

طبعا دي عجينة عادية مقاديرها غير مظبوطة وده علشان تعرفي نعمل اية في الحاله دي . اول ما العجينة تلم حاخدها على جنب وأبدأ أرش دقيق بمقدار 3 معالق في كل مرة .

http://i982.photobucket.com/albums/ae308/cce4ever/how%20to%20make%20a%20dough/67.jpg

ونعجن زي ما قلت بالطريقة الصحيحة وهي اننا ناخذ الجوانب وندخلها في المنتصف

http://i982.photobucket.com/albums/ae308/cce4ever/how%20to%20make%20a%20dough/68.jpg

كدة أول رشة دقيق خلصت والعجينة لسة بتلزق ؟؟؟؟؟

http://i982.photobucket.com/albums/ae308/cce4ever/how%20to%20make%20a%20dough/69.jpg

وكمان في عجين في ايدي ؟؟؟؟؟؟؟؟ يبقى حرش دقيق تاني بنفس الطريقة اشيل العجينة على جنب واحط دقيق القعر وأعجن بالطريقة الصحيحة

http://i982.photobucket.com/albums/ae308/cce4ever/how%20to%20make%20a%20dough/70.jpg

اهو الدقيق الي حتطية وبتدأ تلم تاني وتستوعب الدقيق الجديد

http://i982.photobucket.com/albums/ae308/cce4ever/how%20to%20make%20a%20dough/71.jpg

العجينة بدأ تتماسك ووصلنا لمرحلة اننا ممكن نفرول العجين من ايدنا دققي كدة في الصور دي

http://i982.photobucket.com/albums/ae308/cce4ever/how%20to%20make%20a%20dough/72.jpg


http://i982.photobucket.com/albums/ae308/cce4ever/how%20to%20make%20a%20dough/73.jpg

اتفرول بكل بساطة من ايدي

http://i982.photobucket.com/albums/ae308/cce4ever/how%20to%20make%20a%20dough/74.jpg

لكن بروض لسه العجينة طرية مش ناشفة

http://i982.photobucket.com/albums/ae308/cce4ever/how%20to%20make%20a%20dough/76.jpg

حكمل على الرخامة ححط رشة دقيق كمان وأبدأ اعجنها علشان لسه محتاجة تتخدم وتتعجن . لاحظي اني بحط الدقيق التدريج مش مرة واحدة

http://i982.photobucket.com/albums/ae308/cce4ever/how%20to%20make%20a%20dough/77.jpg

اكرر للمرة الألف طريقة العجين الصحيحة هو اننا ناخذ طرف العجينة ونحطة في النص وهكذا من جميع الاطراف

http://i982.photobucket.com/albums/ae308/cce4ever/how%20to%20make%20a%20dough/78.jpg

بالصورة دي باخذ الطرف واحطة في النص وهكذا مع كل أطراف العجينة

http://i982.photobucket.com/albums/ae308/cce4ever/how%20to%20make%20a%20dough/79.jpg

ونستمر في العجين لحد ما تتماسك بشكل كويس جداً . هنا لسه برضو طرية وما اتعجنتش كويس وبتلزق في ايدي

http://i982.photobucket.com/albums/ae308/cce4ever/how%20to%20make%20a%20dough/80.jpg

يبقى ححط رشة دقيق واعجن تاني علماً اني كل مرحة العجن بتختلف حسب كمية العجينة الي بنعجنها

http://i982.photobucket.com/albums/ae308/cce4ever/how%20to%20make%20a%20dough/81.jpg

كدة تمام سابت ايدي نهائي واتماسكت لكن لسه طرية برضو

http://i982.photobucket.com/albums/ae308/cce4ever/how%20to%20make%20a%20dough/82.jpg

الجميل جاهز

http://i982.photobucket.com/albums/ae308/cce4ever/how%20to%20make%20a%20dough/83.jpg

كدة جاهزة للإستخدام

http://i982.photobucket.com/albums/ae308/cce4ever/how%20to%20make%20a%20dough/84.jpg

5- خصائص العجينة الناجحة

بعد ما ننتهي من العجينة . بتبقى في علامت بتوضحلي مدى نجاح عجنتي وهي
أولا :-
بيبقى سطحها من برى أملس وناعم زي كدة

http://i982.photobucket.com/albums/ae308/cce4ever/how%20to%20make%20a%20dough/85.jpg


تانياً:-
متماسكة من برى وطرية وناعمة من جوة ولو ضغنا عليها كدة بتلزق في الرخامة

http://i982.photobucket.com/albums/ae308/cce4ever/how%20to%20make%20a%20dough/86.jpg

لكن لما بنشدها بتطلع بسهولة بدون ترك أثار كبيرة

http://i982.photobucket.com/albums/ae308/cce4ever/how%20to%20make%20a%20dough/87.jpg

ثالثاُ:-
لما بنشكلها على هيئة كورة في نهاية عملية العجن بتبقى كروية مش سايحة وده معناة لازم توصل لدرجة طراوة معينة لا اكتر ولا اقل .

http://i982.photobucket.com/albums/ae308/cce4ever/how%20to%20make%20a%20dough/88.jpg

رابعاً:-
من برى ملساء جداً ومتماسكة ومن جوة جرية ولزجة شوية

http://i982.photobucket.com/albums/ae308/cce4ever/how%20to%20make%20a%20dough/89.jpg

بصي من جوة عاملة ازاي

http://i982.photobucket.com/albums/ae308/cce4ever/how%20to%20make%20a%20dough/90.jpg

خامساً:-
عند الفرد مش بتحتاج لدقيق كتير رغم طراوتها

http://i982.photobucket.com/albums/ae308/cce4ever/how%20to%20make%20a%20dough/91.jpg

سادساً :-
من الممكن حملها ونقلها بسهولة وتحتفظ بقوامها

http://i982.photobucket.com/albums/ae308/cce4ever/how%20to%20make%20a%20dough/92.jpg

سابعاً:-
عند التقطيع تكون الحواف حادة ومظبوطة . وتحتفظ كل قطعة بشكلها رغم طراوتها

http://i982.photobucket.com/albums/ae308/cce4ever/how%20to%20make%20a%20dough/93.jpg

ثامناُ :-
تحافظ على شكلها بعد تشكليها
هو انا قلبت عربي فصحة لية

http://i982.photobucket.com/albums/ae308/cce4ever/how%20to%20make%20a%20dough/94.jpg

تاسعاً:-
في مرحلة التخمير حجمها بيتضاعف بشكل متساوي ولا يتغير التشكيل نهائي فقط حجمها هو الي بيكبر والمديل بيفضل واضحة

http://i982.photobucket.com/albums/ae308/cce4ever/how%20to%20make%20a%20dough/95.jpg

عاشراً:-
صلي على الحبيب محمد عليه أفضل الصلاة والسلام


6- تقطع وتشكيل وتخمير العجينة

يا جماعة من أهم أسرار نجاح المعجنات هي انك تبقى مقرر من البداية حتعملي اية بالعجينة . سواء باتية او مني دواير او لو حتفرديها في صينية البتيزا او او او الخ
المهم تبقي محددة هدفك من البداية علشان موضوع اننا ناخذ حتى من العجينة ونرجع نلمها تاني ونقعد نقطع ونرجع كتير دة من اهم اسباب نشفان المعجنات بعد عملية الخبز .

http://i982.photobucket.com/albums/ae308/cce4ever/cut%20and%20bake%20the%20dough/1.jpg

هنا قطعت بعد ما العجينة جهزت قررت اعمل :-
1- باتية جبنة كيري
2- دواير مني بجبنة الموزاريلا

http://i982.photobucket.com/albums/ae308/cce4ever/cut%20and%20bake%20the%20dough/2.jpg

نبدأ بدواير الجبنة حاخذ جزء واكوره على شكل كورة وأبدأ فرده

http://i982.photobucket.com/albums/ae308/cce4ever/cut%20and%20bake%20the%20dough/3.jpg

وده السمك المناسب جدا جدا سواء للمني بيتزا او الحجات المني الصغيرة وحتى لمثلثات الكروسون والارتفاع هو 1.5سم . وده بالمقارنة مع صباعي

http://i982.photobucket.com/albums/ae308/cce4ever/cut%20and%20bake%20the%20dough/4.jpg

ويفضل تقطيع العجينة بأدوات حادة علشان يحافظ على شكلة في مرحلة التخمير والخبز

http://i982.photobucket.com/albums/ae308/cce4ever/cut%20and%20bake%20the%20dough/5.jpg

دي الدواير بقت جاهزة عندنا

http://i982.photobucket.com/albums/ae308/cce4ever/cut%20and%20bake%20the%20dough/6.jpg

دي صورة مقربة لإرتفاعها

http://i982.photobucket.com/albums/ae308/cce4ever/cut%20and%20bake%20the%20dough/7.jpg

وباقي العجينة بعد التقطيع بنجمعة ونفرده بس ما نعجنوش في بعض فقط مجرد تجميع على بعض وفرد .

http://i982.photobucket.com/albums/ae308/cce4ever/cut%20and%20bake%20the%20dough/8.jpg

لازم تكون حركتنا سريعة وعارفين تحركاتنا هنا عندي الدواير وعندي جزء العجينة التاني الي حعمل بية باتية

http://i982.photobucket.com/albums/ae308/cce4ever/cut%20and%20bake%20the%20dough/9.jpg

رصيت الأقراص في صينية مدهونة زيت ومتبطنة بورق الزبدة ويفضل دايما المعجنات نخبزها في صواني منخفضة الحواف ما ينفعش الصواني بتاعة الجهاز بتاعنا ده الي بتبقى عالية اوي دي

http://i982.photobucket.com/albums/ae308/cce4ever/cut%20and%20bake%20the%20dough/10.jpg

وفردت قطع من جبنة الموزاريلا عليهم بالشكل ده وده شكلهم قبل التخمير

http://i982.photobucket.com/albums/ae308/cce4ever/cut%20and%20bake%20the%20dough/011.jpg

التخمير
بنصح كل الفتوكات اننا بعد ما نعجن العجينة نبدأ على طول في الحشو والتشكيل بعد كدة نسيبها تخمر براحتها والسبب اننا بالصورة دي حنحافظ على شكل جميل ورائع للمعجنات بعد الخبز وكمان بيدينا هشاشة اضافية للمعجنات وبتكون قطنية وخفيفة بطريقة رهيبة .


يفضل تخمير المعجنات وهي متغطية او نحط الصواني في مكان مقفول ومعزول عن الهواء . والعجائن الي بنستخدم فيها ماء دافئ بتخمر اسرع وطبعا جو الصيف بيخمر المعجنات بسرعة عكس في الشتاء المهم اننا لازم نلاحظ ارتفاع المعجنات ونحس انها اتملت هواء زي كدة بصي على الجمال

http://i982.photobucket.com/albums/ae308/cce4ever/cut%20and%20bake%20the%20dough/11.jpg

وهنا لاحظي في الصور دي من قريب الأقراص ارتفعت واتخمرت بصورة مثالية وشكلها بقى احلى واحلى ولسه محافظة على شكل التقطيع لية علشان كنت حريصة على اتباع الاساسيات الدقيقة بداية من مقادير العجينة وصلاً للتشكيل والتخمير

http://i982.photobucket.com/albums/ae308/cce4ever/cut%20and%20bake%20the%20dough/012.jpg


http://i982.photobucket.com/albums/ae308/cce4ever/cut%20and%20bake%20the%20dough/12.jpg

حبدأ في نشيلك باتية الجبنة الكيري

http://i982.photobucket.com/albums/ae308/cce4ever/cut%20and%20bake%20the%20dough/13.jpg

بفرد العجينة عادي جداً بإرتفاع 1.5سم مش أكتر زي ما اتفقنا

http://i982.photobucket.com/albums/ae308/cce4ever/cut%20and%20bake%20the%20dough/14.jpg

ويفضل استخدام عجلة تقطيع البيتزا علشان بتدينا الشكل الحاد للتقطيع بالاضافة إلى السهولة البالغة في التقطيع . وعلشان نقطعها على شكل مثلثات حنبدأ من المنتصف كدة لحد الحافة . ونرجع تاني من نفس نقطعة الانطلاق الي هي في النص ونطلع على برى علشان يبقى عندنا شكل المثلث

http://i982.photobucket.com/albums/ae308/cce4ever/cut%20and%20bake%20the%20dough/15.jpg

بالصورة دي

http://i982.photobucket.com/albums/ae308/cce4ever/cut%20and%20bake%20the%20dough/16.jpg

ونكمل عمل المثلثات

http://i982.photobucket.com/albums/ae308/cce4ever/cut%20and%20bake%20the%20dough/17.jpg

ونتحكم بسهولة بحجم المثلثات لو عيزينها كبيرة أو ميني ^_^

http://i982.photobucket.com/albums/ae308/cce4ever/cut%20and%20bake%20the%20dough/18.jpg

ونحاول على قد ما نقدر نخلي المثلثات في حجم واحد وممكن لو حسينا اني فيه قطع كبيرة نقطع من المثلث قطعة بالصورة دي لحد ما نحصل على الحجم والشكل الي احنا عيزينة

http://i982.photobucket.com/albums/ae308/cce4ever/cut%20and%20bake%20the%20dough/19.jpg

طريقة لف الكروسون

حتحطي حتة جبنة او الحشو الي بتحبيها على الطرف العريض للمثلث بالصورة دي وتبدأن تغطية بالطرف العريض

http://i982.photobucket.com/albums/ae308/cce4ever/cut%20and%20bake%20the%20dough/21.jpg

كدة غطينا الجبنة بالطرف العريض وشديت رأس المثلث فبقى أطول وأبدأ ألف لحد ما نوصل للنهاية بصي كدة الصور دي

http://i982.photobucket.com/albums/ae308/cce4ever/cut%20and%20bake%20the%20dough/22.jpg


http://i982.photobucket.com/albums/ae308/cce4ever/cut%20and%20bake%20the%20dough/23.jpg

وحنرصهم في صواني مدهونة بالزيت ومتبطنة بورق الزبدة شكلهم وحش اوي بس استني عليهم شوية

http://i982.photobucket.com/albums/ae308/cce4ever/cut%20and%20bake%20the%20dough/24.jpg

وندهن الوش بخليط من :-

صفار بيضة وشوية ماية
او
صفار بيضة وشوية نسكافية وشوية ماية
أو
شوية لبن بسكر
أو
بيضة مع شوية لبن
كلهم بيدو نفس النتيجة بس لازم ندهنهم قبل مرحلة التخمير علشان ما نهبط المعجنات بعد كدة واحنا بندهن

http://i982.photobucket.com/albums/ae308/cce4ever/cut%20and%20bake%20the%20dough/25.jpg

بإسم الله ماشاء الله بصو على الجمال يا ناس هنا بعد ما خمرو

http://i982.photobucket.com/albums/ae308/cce4ever/cut%20and%20bake%20the%20dough/26.jpg

7- الطريقة الصحيحة لخبز المعجنات

المعجنات يا جماعة لازم تتخبز في فرن سخن جدا جدا على حرارة عالية في الرف الي تحت . فرني بوتجاز حرارته (130-220) بخبز دايما على حرارة 200 . ليه بقى علشان المعجنات لما بتتخبز على حرارة عالية ولمدة قصيرة جدا جدا بتدينا معجنات بحجم وانتفاخ كبير وبتبقى هشة وقطنية من جوة والعكس صحيح . لو خبزناها في فرن متوسط الحرارة او على نار هادية لمدة طويلة مش حتنفش كتير وحتبقى مكتومة وزي ما يكون بايته ومش هشة ولا طرية . وعملية الخبز يا جماعة مهمة جداً علشان هي الي بتظهر تعبنا في مرحلة العجن والتشكيل والتخمير .


المرحلة دي كانت أصعب مرحلة لاني الصور الجاية كلها من الفرن وطبعاً الفرن سخن نار وانا قاعدة في الوش وعلمية التصوير بتاخذ وقت فكنت بحس بلسعة النار على وشي وايدي .اللهم باعد بيننا وبين جهنم كما باعدت بين المشرق والمغرب.بس كله يهون علشان أوصلكم المعلومة

هنا شكل أقراص جبنة الموزاريلاً بعد حوالي 4 دقايق بصو قبت ونفشت على طول ازاي ولونها فتح أكتر

http://i982.photobucket.com/albums/ae308/cce4ever/cut%20and%20bake%20the%20dough/27.jpg

وده الكروسون كمان بدأ ينفش خلال 4 دقايق

http://i982.photobucket.com/albums/ae308/cce4ever/cut%20and%20bake%20the%20dough/28.jpg

هنا بعد 7 دقايق الأقراص نفشت أكتر وأكتر ازاي ولونها بقى ابيض فاتح وأفتح من الجبنة المزرايلا نفسها

http://i982.photobucket.com/albums/ae308/cce4ever/cut%20and%20bake%20the%20dough/29.jpg

وهنا من قريب

http://i982.photobucket.com/albums/ae308/cce4ever/cut%20and%20bake%20the%20dough/30.jpg

وكمان الكروسان بعد 7 دقايق لازال بينفش ازاي

http://i982.photobucket.com/albums/ae308/cce4ever/cut%20and%20bake%20the%20dough/31.jpg

وهنا من قريب الكمال لله وحده

http://i982.photobucket.com/albums/ae308/cce4ever/cut%20and%20bake%20the%20dough/32.jpg

بصو بقى هنا . بعد 9 دقايق بالظبت تضاعفت لأقصى درجة. عرفت ازاي علشان أطراف الكروسان مش باينة

http://i982.photobucket.com/albums/ae308/cce4ever/cut%20and%20bake%20the%20dough/33.jpg

بصي كدة من قريب قصدي اية . خطوط الكروسان بقت باهتة اوي مش زي الاول ناخذ بالنا اوي علشان القعر حيبدأ ياخذ اللون الدهبي الجميل

http://i982.photobucket.com/albums/ae308/cce4ever/cut%20and%20bake%20the%20dough/34.jpg

كدة تمام خلال 9 دقايق استوت والقعر احمر ونفشت وبقت تمام

http://i982.photobucket.com/albums/ae308/cce4ever/cut%20and%20bake%20the%20dough/35.jpg

رفعتها تحت الشواية علشان الوش يتحمر

http://i982.photobucket.com/albums/ae308/cce4ever/cut%20and%20bake%20the%20dough/36.jpg

وأقراص الجبنة الجميلة بقت نافشة لأقصى درجة ممكنة والجبنة باسم الله ماشاء الله بتدوب اهي . ونتدأكد اني القعر احمر

http://i982.photobucket.com/albums/ae308/cce4ever/cut%20and%20bake%20the%20dough/37.jpg

رفعتها على الشواية علشان الجنبة تدوب اكتر والوش يحمر بشكل كامل

http://i982.photobucket.com/albums/ae308/cce4ever/cut%20and%20bake%20the%20dough/38.jpg

كدة تماما ما أخدتش نص دقيقة

http://i982.photobucket.com/albums/ae308/cce4ever/cut%20and%20bake%20the%20dough/39.jpg

نطلعها الصواني من الفرن ونسيبها تهدى وده شكلها بعد حوالي ال20 دقيقة لا هبطت ولا جرالها حاجة زي مايكون لسه في الفرن

http://i982.photobucket.com/albums/ae308/cce4ever/cut%20and%20bake%20the%20dough/40.jpg

بإسم الله ماشاء الله ده المطلوب منفوشة وجميلة

http://i982.photobucket.com/albums/ae308/cce4ever/cut%20and%20bake%20the%20dough/41.jpg

والقعر محمر وذهبي وما لزقش علشان دهنا الصينية كويس

http://i982.photobucket.com/albums/ae308/cce4ever/cut%20and%20bake%20the%20dough/42.jpg

8- خصائص المعجنات الناجحة

بعد ما التزمنا بكل التكات والاسرار والأساسيات والمهارات أكيد وبإذن الله معجناتنا حبتقى ناجحة نجاح مبهر تعالو كدة نشوف اية هي خصائص المعجنات الناجحة .


أولا :
بيكون اللون موحد تقريباً بين كل المعجنات

http://i982.photobucket.com/albums/ae308/cce4ever/cut%20and%20bake%20the%20dough/43.jpg


http://i982.photobucket.com/albums/ae308/cce4ever/cut%20and%20bake%20the%20dough/44.jpg


http://i982.photobucket.com/albums/ae308/cce4ever/cut%20and%20bake%20the%20dough/47.jpg

ثانياً:-
حجم المعجنات زي ما هو لما كان في الفرن ما بيهبط ولا بيتغير

http://i982.photobucket.com/albums/ae308/cce4ever/cut%20and%20bake%20the%20dough/45.jpg

ثالثاُ:-
لو كنا عاميلين دواير او ميني بتيزا بتفضل بنفس ارتفاع مش بتهبط بالذات من المنتصف

http://i982.photobucket.com/albums/ae308/cce4ever/cut%20and%20bake%20the%20dough/46.jpg

رابعاً:-
بنلاحظ لمعة الوش من تأثير صفار البيض او اللبن الي دهنه بيه الوش

http://i982.photobucket.com/albums/ae308/cce4ever/cut%20and%20bake%20the%20dough/48.jpg

خامساً:-
لما نقطع طرف الباتية بنشوف القطن خرج ولما بنضغط عليه مش بتعجن في بعض لا بتبقى زي السفنجة بتضغطي عليها وبعد ما تسبيها بترجع زي ما كانت

http://i982.photobucket.com/albums/ae308/cce4ever/cut%20and%20bake%20the%20dough/49.jpg


http://i982.photobucket.com/albums/ae308/cce4ever/cut%20and%20bake%20the%20dough/50.jpg

سادساً:-
قعر المعجنات لونة موحد ومتماسك

http://i982.photobucket.com/albums/ae308/cce4ever/cut%20and%20bake%20the%20dough/51.jpg

سابعاً :-
شكلها النهائي متناغم ومحترف

http://i982.photobucket.com/albums/ae308/cce4ever/cut%20and%20bake%20the%20dough/52.jpg

ثامناً وأه من ثامناُ:-
لما تاكلها بتكون في منتهى الطراوة وبتتبلع لوحدها كدة من غير عصير

http://i982.photobucket.com/albums/ae308/cce4ever/cut%20and%20bake%20the%20dough/53.jpg


http://i982.photobucket.com/albums/ae308/cce4ever/cut%20and%20bake%20the%20dough/54.jpg

وهنا من غير فلاش الكاميرا

http://i982.photobucket.com/albums/ae308/cce4ever/cut%20and%20bake%20the%20dough/55.jpg

تم بحمد لله

طبعاً درس كبير أوي وأخذ وقت طويل في كل حاجة في الاعداد والتنفيذ والتصوير وتحميل الصور وكتابة الموضوع وتنسيقه .لكن كل أمنيتي يبقى موضوعي ده مرجع على صفحات الإنترنت لكل البنات الي عندهم أي مشكلة مع العجين


بتمنى درسي البسيط يكون حاز على إعجابك وأضاف ليكي حاجة جديدة .


مع محبتي
كنت معاكم

اختكم /
شيف لطيفة مسعود



التقييم
شاركي معنا