طريقه كباب ملوكي عراقي

بواسطة: بنبونة

تاريخ الوصفة: 10/03/2023

طريقة عمل كباب ملوكي عراقي بالصور من وصفات مطبخ الشيف العراقية بنبونة

وصفة تحضير كباب ملوكي اكلة شعبية لذيذة من المطبخ العراقي الشعبي الاصيل

من اطيب الاكلات بالسفره العراقيه 🇮🇶 ... كباب ملوكي ويقدم للملوك ... كلش طيب ولذيذ ومشبع وسهل ومكوناته تقريبا متوفره دائما ...

iraqi Kebab supreme recipe

مكونات و مقادير عمل كباب ملوكي عراقي :

للكباب او الكفته نحتاج :

* نص كيلو لحم مفروم وبيه نسبه دهن قليله

* ٢ ملعقه كبيره طحين عادي

* ٢ بصله كبيره او ٤ صغيرات نبرشهم او نفرمهم ناعم بالمكينه ونحاول نصفيهم من الماي الي ينزل منهم

* ملح وفلفل وبهارات خفيفه
* ممكن اضافه بقدونس مفروم ناعم جدا للكباب ( اختياري )

لخلطه الخضار نحتاج :
* بصلتين كبار نقطعهم شرايح رفيعه

* فليفله خضره او ملونه حسب المتوفر ونقطعها مثل البصل شرايح رفيعه

* ٣ حبات طماطه متوسطه نقطعهم شرايح رفيعه

للصلصه نحتاج :
*ملعقه كبيره معجون طماطه

* ملعقه كبيره دبس رمان

* ملح وفلفل

* كوب ماي ...

طريقة عمل وتحضير كباب ملوكي عراقي :

لعمل الكباب او الكفته

* نخلط كل المكونات مع اللحم ونعجنهم جيدا ونشكلهم على شكل اصابع مثل كباب الشوي
* نحطهن بالفرن يتحمرون او نحطهم بطاوه على النار مع زيت خفيف يتحمرون من الجهتين ...

لباقي الطبق نحتاج :
* شريحتين خبز ندهنهن بشوي زيت خفيف ونحمصهم بالفرن

( بالوصفه الاصليه نستخدم الخبز العراقي ... بس انا استبدلته بالخبز اللبناني لانه اخف )

لعمل خلطه الخضار

بطاوه على النار نحمس البصل بشوي زيت مع الكركم ونضيف عليه الفليفله ونقلبهم وبس يذبلون نحط الطماطه ونقلب

* نحط ملح وفلفل اسود

لعمل الصلصه
نخلط مقادير الصلصه كلها مع بعض

* هسه بقى بس نحط شي فوق شي بالطاوه او البايركس او الصينيه الي رح تستخدموها
* نحط خبزه وحده محمصه ونحط عليها ملعقه كبيره من الصلصه الحمره

* نحط الكباب الي سويناه ونرتبه على الخبزه

* نرش عليه ملعقه كبيره او اكثر ( سماق )
والسماق ضروري يا جماعه ينطي طعم كلش طيب

نحط فوق الكباب خلطه الخضار ونرتبها

* نحط رشه بقدونس مفروم

* نحط ملعقه كبيره من الصلصه على الخضار

نغطي الاشياء كلها بالخبزه الثانيه

* نحط باقي الصلصه كلها على الخبزه

* ندخلها الفرن حتى ترجع تسخن والمكونات تتجانس وتتشرب الصلصه اللذيذه

* يزين بالبقدونس المفروم

بالعافيه

ملاحظات :
* انا استخدمت ٣ خبزات لبنانيه ... حطيت اثنين بالارضيه ووحده غطيت بيها الطبق لان الخبز اللبناني خفيف مقارنة بالعراقي

* ممكن اضافه قرون فلفل حار للطبق مع الخضار اذا تحبون الفلفل الحار ...

وتقدم الكباب الملوكي العراقي بالعافية

صحتين وعافية ❤️