مجبوس تونه اماراتي لذيذ

بواسطة: بنت الإمارات

تاريخ الوصفة: 19/04/2023

طريقة مجبوس تونه اماراتي بالصور من مطبخ بنت الإمارات

وصفة مجبوس التونه من المطبخ الاماراتي لذيذ وسهل

العادة المجبوس لازم يحطون فيه كركم أنا سويت المجبوس بدون كركم وطلع وياايه لذيذ وناطع 👩‍🍳👩‍🍳

how to make emirati tuna machboos recipe

مقادير عمل مجبوس التونه :

علبتين أو 3 تونه معلبة
1 بصلة كبيرة مقطع تقطيع صغير
1 حبة بطاطا مقطع مربعات صغار
3 فصووص مقطعين شرائح أو مفرومين
3 أقران فلفل حار
بعض من أوراق الكاري أن وجد
1/2 علبة صغيرة من معجون الطماط = ملعقتين كبار
نحتاج الى ليمونه جافه ومكعب ماجي
البهارات المستخدمه👩‍🍳
ملعقة كبيرة بهارات مشكله
ملعقة صغيرة بهارات الكاري لمن يرغب مو ظروريه
ملعقة وسط كمون بودرة
ملعقة وسط كزبرة بودرة
ملعقة صغيرة فلفل أحمر
وملعقة صغيرة فلفل اسود
وملح حسب الحاجة

طريقة عمل مجبوس التونه :

بالبدايه أغسل ٣ اكواب رز
اغسله بالماي عدة مرات وانقعه بماء فاتر..

افتح علب التونه
أصفي وحده من الزيت
والثانيه اترك الزيت راح احتاجه..

اقطع البصل والبطاطا
واجهز المقادير

بالبداية بالقدر أحط زيت من علبة التونه

وشوية من زيت العادي

بعدين انزل البصل والبطاطا وورق الكاري

كلوو مع بعض واحمس لين يتحمرو

بعد مايتحمرو
انزل الثوم والفلفل الاخضر الحار واحمس

وبعدها احتاج الى مكعب ماجي واحد

ونص علبة صلصلة الطماط

وانزل مكعب ماجي

وملعقتين كبار صلصة واحمس

وبعدها انزل التونه

وملعقة كبيرة بهارات مشكله وملعقة وسط كمون بودرة وكزبرة بودرة وفلفل أحمر بودرة وملعقة صغيرة فلفل أسود وملعقة ملح كبيرة

وأنزل كاستين ماء

واغطي عليهم ربع ساعه لحد نضوج البطاطا على نار متوسطه..

حطيت فوقهم ليمونه جافة مقطعه بتعطي نكهة مميزة

وحطيت بعد ملعقة صغيره من هيل مطحون ممزوج ويا زعفران مطحون
واتذوق الملح....

واتركهم يغلو مع بعض لحد نضوج البطاطا

بعدها اصفي الرز المغسول من الماء
وأنزل الرز

وأحاول أساوي بين الرز والماء بحيث ارتفاع الماء يكون بمقدار بسيط

واكتم القدر على نار هادية جدا لمدة ١٥ دقيقة..

ويقدم مجبوس التونه وينوكل هو ساخن لذيذ وبالعافية..

ويقدم المجبوس مع روبه وخيار أو شطة حارة وبيض مسلوق وليمون..

🤗🤗 صحتين وعافية