• EN
  • اشراف أم حاتم
موسوعة الطبخ المطبخ العربي المطبخ السوري الشيخ المحشي كوسا باللبن - شيخ المحاشي السورية بالخطوات المصورة

الشيخ المحشي كوسا باللبن - شيخ المحاشي السورية بالخطوات المصورة

بواسطة: إيثار الشام
تاريخ الطبخة: 09/10/2012

الشيخ المحشي كوسا باللبن - شيخ المحاشي السورية بالخطوات المصورة
http://static.hawaacdn.com/upload/1/2/6/0/5/9/2/506a77502d9fb.jpg
الكوسا باللبن , أو الشيخ المحشي , وما أدراكم ما الشيخ المحشي
أكلة سورية لذيذة جدآ جدآ

المقادير :


كوسا حجم صغير , أو وسط , لكن الصغير أفضل , و يفضل أن تكون خضراء , و مقطوفة حديثآ

http://static.hawaacdn.com/upload/1/2/6/0/5/9/2/506a768b9d337.jpg

لحمة هبرة مفرومة , و فيكي تحطي معها نسبة قليلة جدآ من الدهنة إذا حبيتي , فرمناها بماكينة فرم اللحمة , بالمصفاية الخشنة , و قليناها عالنار مع ملح و كمون , و بهار طيب , و خلينا الملح و البهار , ظاهر يعني كتير شوي .



ملاحظة : اللحمة بدون بصل , و هيك أطيب , و على مسؤؤليتي .



للمرقة : لبن رائب ( زبادي ) , ماء , نشا


الخطوات :


بعد غسل الكوسا جيدآ , و تركها لتجف : نحفر الكوسا , من الأسفل , متل الصورة تمام , و الحفر بهالطريقة , لسهولة الحشي , بعد قلي الكوسا , و إلا راح تلاقي صعوبة كبير بالحشي بعدين , و راح نشيل فقط عمود واحد من قلب الكوساية .


http://static.hawaacdn.com/upload/1/2/6/0/5/9/2/506a768c60b80.jpg

نقلي الكوسا بزيت غزير حتى تنضج


http://static.hawaacdn.com/upload/1/2/6/0/5/9/2/506a768d28bd8.jpg

و هذه الكوسا بعد قليها , و نضجها


http://static.hawaacdn.com/upload/1/2/6/0/5/9/2/506a768e1ce9b.jpg

نضع الكوسا في مصفاية , بحيث يكون الثقب للأسفل , و نضع المصفاية فوق وعاء مناسب , و نتركها حتى تبرد , و تصفى من الزيت , جيدآ .


http://static.hawaacdn.com/upload/1/2/6/0/5/9/2/506a774cb2142.jpg

نحضر الحشوة , بفرم اللحمة , و قليها مع شوية زيت مازولا عالنار , مع كمية ظاهرة من الملح و البهار , و رشة كمون , و نضع معها صنوبر


http://static.hawaacdn.com/upload/1/2/6/0/5/9/2/506a774d89719.jpg

ثم نحشو حبات الكوسا , و بمساعدة الخنصر ندخل اللحمة جيدآ إلى قعر الكوساية .


ملاحظة هامة جدآ : في بعض الأحيان , نلاحظ أن الكوسا أثناء الحشي طرية جدآ , و هذا عائد لنوعية الكوسا , لدرجة أن الكوسا تكاد تتمزق أثناء الحشي , و يجب مراعاة الانتباه و الحذر الشديدين , أثناء الحشي



تحضير مرقة اللبن الزبادي :


لم أصور هذه المرحلة , لأن كل ست بيت أكيد عندها خبرة بهالموضوع , يعني إنت و خبرتك , و لكن إذا ما عندك خبرة فراح قول كيف حضرناها , لأنه هالموضوع صاير خبرة أكتر منه مقادير :




المي يلي حطيتيها بالطنجرة فوق الكوسا ( راح نحكي عليها بعد شوي )

عيريها أديش حجمها

و جيبي طنجرة تانية , و حطي فوقها مصفاية شبك كبيرة

نزلي الزبادي بالمصفاية ( في ناس بيضربو الزبادي مع النشا و المي بالخلاط )

كمية الزبادي لازم تكون ضعفين كمية المي يلي بالطنجرة

جيبي نشا , و دوبيهن بشوية مي , و نزلي النشا كمان بالمصفاية مع المي المدوب فيها

و كمية النشا : فيني قلك : بالموضوع : استخدمنا حوالي تلت أرباع كوب كبير

و نزلي بعد النشا كمان شوية مي ( هون استحدمنا كاسة كبيرة زيادة )

و حطي الطنجرة عالنار , وحركي بالكبجاية , و خلي الكبجاية ملامسة لأرض الطنجرة

و خلي التحريك بشكل مستمر ليغلي اللبن الزبادي

, و لازم نحرك بشكل مستمر , و إلا مرقة اللبن بتفرط , و بتطلع فاشلة , و ديري بالك بس يغلي اللبن , وطي النار علآخر أو اطفي الغاز , لأن اللبن بيفور عند الغليان .


هلأ : الكوسا المحشية , إذا حطيناها بمرقة اللبن , ما بتستوي باللبن , و النشا , مشان هيك , حطيناها بالطنجرة , و غمرنا تلت أرباعها بالمي , و حطينا الملح , و شعلنا الغاز , و تركناها تغلي عشر دقايق , بالمي لتستوي , و لا تنسي تغطي الطنجرة بهالمرحلة .


http://static.hawaacdn.com/upload/1/2/6/0/5/9/2/506a774e614fb.jpg

بعد ما استوت الكوسا بالمي , راح نصب اللبن المغلي لفوق الطنجرة , و مشان هيك , حطينا مع الزبادي , فقط شوية ماء و ما كترنا , لأن الماء يلي فوق الكوسا , راح يعدل اللبن المغلي , لنحصل عالسماكة المناسبة ( هالموضوع بيعتمد على خبرتك ) .


كمان ملاحظة هامة جدآ : إذا كانت الكوسا من النوع الطرية جدآ يلي حكينا عليها بالملاحظة السابقة , ما في داعي , نخليها تستوي بالمي , راح نحضر مرقة اللبن , مع الكمية المناسبة من المي مباشرة , و بس تغلي , منحط الكوسا فيها فورآ و منتركهن يغلوا مع بعض شي عشر دقايق أو ربع ساعة عالغاز على نار هادية .



هلأ : في شغلة مهمة كتير . لازم نعرفها , لحتى تطلع الأكلة طيبة كتير كتير , لازم الكوسا ييتشرب طعم اللبن أثناء الغليان , يعني كل ما غلوا مع بعضن أكتر , بتلاقي الكوسا أطيب , و لكن مدة الغليان تعتمد على نوع الكوسا , يعني الكوسا الطرية جدآ خليها تغلي مع اللبن , شي عشر دقايق أو ربع ساعة , مو أكتر , مشان ما تتمزق بقلب اللبن , و تتشقق , و لكن الكوسا يلي خليناها تستوي بالمي , ممكن تخليها تغلي تلت ساعة , أو حتى نصف ساعة , و ما مننسى , على نار هادية , نحن لقينا الكوسا بتلقى , فخليناها تغلي عالنار الهادية نص ساعة


http://static.hawaacdn.com/upload/1/2/6/0/5/9/2/506a774f376ff.jpg

و الحمد لله كانت كتيييير طيبة , و شهية


وبس تطفي النار , صبي الكوسا مع المرقة فورآ بالجاط أو بالصينية البيركس , بتلاقي منظرها حلو , و اتركي الكوسا تبرد شوي بقلب الصينية , مشان تتشكل طبقة القشطة ( طبقة اللبن السميكة ) على وجه الصينية , و إلا إذا تركتي الكوسا بالطنجرة , راح تتشكل هالطبقة , على وجه الطنجرة , و تخرب وقت بتصبي الكوسا


و هي قلب الكوساية بعد ما استوت


http://static.hawaacdn.com/upload/1/2/6/0/5/9/2/506a77502d9fb.jpg

قدميها مع الرز المفلفل مع الشعيرية


http://static.hawaacdn.com/upload/1/2/6/0/5/9/2/506a796aa62ba.jpg
و أخيرآ في ملاحظة مهمة لازم نقولها :


الزيت يلي قلينا فيه الكوسا , راح ييتشرب طعمة الكوسا

و إذا قلينا فيه أي شي تاني : مثلآ بطاطا

راح تتشرب البطاطا طعم الكوسا المقلية

و مشان هيك :

نحن مخصصين زيت مخصوص للكوسا المقلية بوعاء , منفرد

كل ما حبينا نقلي كوسا للشيخ المحشي أو للمتبل

منستعمل هادا الزيت و بس يبرد بنرجعو عالوعاء, و منخبيه لمرة تانية



و بالهنا , الشفا


و تقبلوا أحلى باقة ورد جوري , و مع كل الود


التقييم
شاركي معنا