طريقة المحلى للنفاس

طريقة عمل المحلى للنفاس



المحلى او عصيدة التمر للنفاس

والعصيدة مرة مرة مفيدة للنفاس واللي عليها الدورة

مقادير ومكونات وطريقة عمل محلى التمر للنفاس :


شفتي كوب الخلاط ، عبي ثلاثة ارباعة موية حارة و حطي فيه 30 حبة تمر و انزعي النوى ( التمر اللي يجيك محشي مو اللي يجيك قاسي )


اخلطيهم مع بعض زين ب الخلاط


حطي الخليط بقدر و شغلي النار و اذا بدا يطبخ نقصي على النار


اللحين بما انه بدا يطبخ حطي من البهارات المطحونة و هي
(نص ملعقة فلفل ابيض ، نص ملعقة فلفل اسود ، ربع ملعقة زنجبيل ، ربع ملعقة كمون ، ملعقة قرفة )

و حطي هيل غير مطحون ( 10 حبات ) تطلع طعم رهيب و نكهة مميزة بالعصيدة👌🏻👌🏻



خليها تطبخ على نار هادية ربع ساعة ثم شيلي منها الهيل ب الملاسة (الصفاية)

خلاص شلتي حبات الهيل ؟ اللحين حطي بالقدر ملعقة شمر (البعض يسميه سنوت)

السكر مع انو العصيدة راح تكون شوي حالية عشان التمر لكن انا عن نفسي احبه في العصيدة لازم اضيف ملعقتين سكر او ثلاث لكن انتي ذوقي سكر المطبوخ و شوفي اذا انك تبين تزيدين سكر او ما تبين سكر بالمرة (ع حسب رغبتك)



اللحين في طاسة اخلطي كوب طحين اسمر و نص كوب حليب جاف
(حركيهم زين عشان يختلط الحليب بالطحين)

صبيه شوي شوي على مطبوخ التمر اللي بالقدر و حركي سريع سريع عشان ما يتكتل

و اذا تبين طريقة اسهل و تضمن لك من التكتُل استخدمي (الة الخفق اليدوية حقة المعجنات) رهيبة انا استخدمها👌🏻👌🏻



اذا شفتي انها سايلة جداً زيدي طحين

و اذا شفتي انها مرة ثقيلة اضيفي كوب موية زيادة
(قوامها المطلوب و هي بالقدر يكون زي السيريلاك)

اللحين خلاص خليها ع نار هادية تطبخ برواق لمدة 30دقيقة

لكن بعد كل دقيقتين او خمس حركيها زين لانها راح تلزق ب اسفل القدر لو ما تراقبينها و تحركينها راح تتكتل عليك شوي



اللحين قبل لا تطفين النار بعشر دقايق اضيفي
(5 ملاعق حب رشاد + ملعقة حبة البركة السوداء)

حركيها و خليها عشر دقايق و طفي و على طول حوليها في حافظة او برطمان

قبل لا تاكلين منها اضيفي لها فوق شوي عسل و شوي سمن وممكن فلفل اسود

(ع حسب الرغبة طبعاً)

لكن مو تضيفين للعصيدة كاملة

لا اضيفي للكمية اللي بتاكلينها فقط

عاد جربي يا النفساء هالعصيدة مع القهوة و ادعي لي لكن دامك بالنفاس اشربي معها قهوة قشر افضل 👌🏻

قوام المحلى او عصيدة التمر الصحيح بعد الطبخ يكون زي قوام الجريش او قوام العيش السعودي او قوام السيريلاك او الزبادي

يعني لا يجي في بالك انها بتكون قاسية يوم ان اسمها عصيدة



البهارات اللي ما يصلح تستغنين عنها هي القرفة و الفلفل الابيض و حبة السوداء و الرشاد ✋🏻

اما بقية البهارات لو ما توفرت عندك ف مو مشكلة لكن وجودها راح يخليها افضل بكثير كدواء كامل متكامل للنفاس

انا اوزعها في علب او علب المنيوم و احفظها بالثلاجة صالحة لمدة 5 ايام بالضبط

وبالعافية