مجبوس ربيان اماراتي احمر
بواسطة: بنت الإمارات
تاريخ الوصفة: 14/07/2023
مجبوس روبيان أحمر على طريقتي الخاصة سهل وسريع ولذيذ وبالخطوات خطوة خطوة للمبتدئين 👨🍳👩🍳
how to make emirati machboos rice rubyan recipe with pictures
مكونات ومقادير عمل مجبوس ربيان اماراتي احمر :
3 كاسات رز هندي مغسول ومنقوع نص ساعة
1 بصل تقطيع صغير
فصين ثووم مفرومين
ورق كاري لمن يرغب
4 أعواد فلفل أخضر صغار
شوية كزبرة وربع فليفله بارده مقطعه حجم كبير
البهارات راح نحتاج ألى 👩🍳
ملعقة صغيرة كركم
ملعقة كبيرة بهارات مشكله
ملعقة وسط بهارات الكاري
ملعقة صغيرة فلفل أحمر بودرة
و3 ملاعق ملح صغيره
وملعقة صغيرة زنجبيل بودره أو فرش لمن يرغب مو ظروري
راح نحتاح من البهارات صحيحه 1 لميونه جافه أسود ورق غار
وشويه كمون حب وشويه فلفل أسود حب وفلفل مجفف وحبتين هيل
كيلووو روبيان مغسوول ومنظف 🍤🍤
ملعقتين كبار صلصلة طماط
طريقة عمل وتحضير مجبوس ربيان اماراتي احمر :
في البداية
غسلت الروبيان جيدا
وأزلت الخط الاسود من ظهرها
ونقعته بريح الليمون ١٠ دقايق..
هذي البهارات الصحيحة اللي راح استخدمها
ومقادير البصل والثوم والكزبرة مقطعه بهذا الشكل
للمجبوس أنا استخدم سمنة أصيل طعمها لذيذ مره بالكبسه 😋
اذا لم يتواجد حطو زيت👍
حطيت سمنة ملعقة كبيرة والبهارات الصحيحة
ونزلت البصل والفلفل البارد ورق الكاري
ونقلبهم ونحمس لين تطلع ريحتهم
ونضيف ملعقة صغيره زنجبيل بودره أو فرش
وممكن الأستغناء عنها
أغسل الروبيان من ريح الليمون
واصفيه بمصفاه مثل هاي عشان مايكون فيه ماي
ومن يتحمر البصل
انزل عليه الروبيان
واقلبهم وانتظر لين تنزل عصارة الروبيان مع التقليب
ثم احط ملعقة صغيرة كركم
واحمس
وانزل ملعقتين كبار من صلصلة الطماطم
واحمس
الحين انزل ملعقة صغيرة فلفل أحمر بودره
وملعقة بهارات مشكله
وملعقة كاري أو ملعقة بهارات الروبيان بدل الكاري..
أنزل الكزبرة
واضبط الملح
واحمس..
وانزل عليهم ماء نظيف لين يغمر الروبيان بشوي
وأسكر غطا القدر لمدة ٢٠ دقيقه
ياخذو غلوة ولحد استواء الروبيان
أنا ماشيه معاكم خطوة خطوة 😎
تاكدو من الروبيان استوا
خلاص نحط العيش
العيش مغسول ومنقوع نص ساعة
ومصفى من الماء
انزل الرز على مرقة الروبيان
واضبط بحييث يكون ارتفاع الرز عن المرقه فقط ٢ سانتي
واكتم عليه بغطا القدر
لين ياخذ غلوة بسيطة ويتشرب الرز قليلا
وتظهر عندي هذي الفقاعات
وخلاص اسكر عليه بالالمنيوم جيدا وأكتم عليه
واتركه على نار هادية لمدة ٢٠ دقيقة...
شوفو اشحلاته 🤤🤤🤤 يجنن ونثري
ونسكبه ونقدم المجبوس وهو ساخن
ونزينه بالكزبره والبيض
ويقدم صحتين وعافية..
يقدم مجبوس الربيان مع اتجار أو زبادي أو شطة 😊😋 وصوص زبادي بالخيار والطماطم..
وصحتين وهنا على قلوبكم يارب ❤❤
