مضغوط دجاج سريع

المضغوط هذا سرييييع مره وخطواته سهله
وبدون تكشين ولا شي والصراحه الذ من المكشن

ونبدا بالخطوات المصوره

اول شي حطي في قدر الضغط حبة طماطم مطحونه
وملعقتين كبار معجون طماطم وكمون وبهار دجاج وملح
وماجي ابيض وبهارات عدله هيل ودارسين وفلفل اسود
وورق غار وليمونه سودا وحبحر حار طازج وزيت اكثر من
الرز العادي وكاس مويه مثل ماتشوفون



بعد كذا شبي عليه لين يطبخ ويتسبك شوي مدة
خمس دقايق بهالشكل



وفي مدة طبخه قطعي الدجاج ونظفيه وحطيه عليه



وسكري قدر الضغط واكتميه وبعد الصوت قصري له
مره وخليه عشر دقايق وطفي النار وافتحي الكاتم
وهذا شكله الدجاج مستوي وذايب على الاخر



طبعا تكونين منقعه الرز تكبينه على الدجاج وتخلينه يغلي
لين يتشرب شوي ولا تخلين فيه الا شوي مويه
يعني يبان الرز بهالشكل



في هالوقت اكتميه واذا طلع الصوت قصري له بسرعه
لايحترق وخليه عشر دقايق الى ربع ساعه
وافتحيه واستمتعي بالذ مضغوط
وهذا شكله النهائي



وافضل سلطه للمضغوط سلطة الخيار والبصل الورق
وبعد الاكل ورق نعناع طازج لازالة اثار البصل
وايضا شوربة البطاطس والكريسبي المقلي
وهذي الوجبه كامله



اتمنى يعجبكم وتقررون تجربونه
عليكم بالف صحه وعافيه